BAKI, 23 dekabr — Sputnik. Sürücülər sərnişinlərin minib-düşməsi üçün avtobus zolağından istifadə edə bilər. Bu barədə Sputnik Azərbaycan-a Bakı Nəqliyyat Agentliyindən bildiriblər.
Sürücülər bunu o zaman edə bilərlər ki, həmin yerdə başqa qadağanedici nişan yoxdur.
BNA-nın məlumatına görə, əgər avtobus zolağı qırıq-qırıq nişanlanma xətti ilə qalan hərəkət hissəsindən ayrılmışdırsa, digər nəqliyyat vasitələri aşağıdakı hallarda həmin zolaqdan istifadə edə bilərlər:
- Sağa dönərkən (müvafiq kənar vəziyyət tutmaq üçün);
- Sağa döndükdən sonra döndüyü yolun sağ kənarına yaxın hərəkət etmək üçün (lakin döndükdən dərhal sonra zolağı tərk eləməlidir);
- Başqa qadağalar yoxdursa, sərnişinlərin minməsi və düşməsi üçün. Başqa məqsədlər üçün avtobus zolağında nəqliyyat vasitəsi hərəkətsiz vəziyyətə gətirilə bilməz.
