BAKI, 25 sentyabr — Sputnik. Bakıda keçirilən cüdo üzrə dünya çempionatı davam edir. Sputnik Azərbaycan xəbər verir ki, dünya çempionatında bu gün Azərbaycanın daha iki cüdoçusu — Elmar Qasımov və Zelim Kotsoyev tatamiyə çıxıb.
Hər iki idmançımız mübarizəyə 100 kq çəki dərəcəsində qoşulublar. Elmar Qasımov dünya çempionatında hər iki görüşünü qələbə ilə başa vurub. Belə ki, o, 1/32 finalda İsveç idmançısı Martin Paceklə mübarizə aparıb və rəqibini ippon ilə məğlub edib.
Cüdoçumuz növbəti mərhələdə — 1/16 finalda Monteneqro təmsilçisi Danilo Pantiçlə mübarizəyə başlayıb. Qasımov bu qarşılaşmada da 1 dəqiqə 58 saniyəyə rəqibinə ipponla qalib gəlib.
Elmar Qasımov 1/8 finalda Gürcüstan təmsilçisi Varlam Liparteliani ilə qarşılaşacaq.
Eyni çəkidə mübarizə aparan digər idmançımız Zelim Kotsoyev isə isveçli Yoakim Dvarbiyə 3 dəqiqə 8 saniyəyə məğlub olub. O, rəqibin ağrıdıcı saxlama fəndi qarşılığında təslim olub.
