BAKI, 9 iyul — Sputnik. Azərbaycanlı zəvvarların Həcc ziyarətinə gediş-gəliş tarixi ilə bağlı dəyişiklik edilib. Sputnik Azərbaycan xəbər verir ki, azərbaycanlı zəvvarlar ziyaratə bu il avqustun 14-ü, 15-i və 16-sında deyil, avqustun 11-i, 12-i, 13-ü, 14-ü və 15-ində yola düşəcəklər.
Zəvvarların sentyabrın 1-inə, 2-sinə və 3-ünə planlaşdırılmış dönüşü isə 1, 2, 3, 4 və 5 sentyabr tarixlərində baş tutacaq.
Digər dəyişiklik isə, xidmətlə bağlıdır. Belə ki, bu il əvvəlki illərdən fərqli olaraq iki növlü səfər xidməti yoxdur, yalnız bir növlüdür.
Qeyd edək ki, bu il üçün Azərbaycandan Həcc ziyarətinin xərci 4150 dollardır. Azərbaycandan bu il 1170 zəvvarın səfər edəcəyi nəzərdə tutulub.
Yaxın Şərqdə baş verən münaqişələr səbəbindən ziyarət yalnız təyyarə reysləri ilə təşkil olunur. Həcc ziyarətinə uçuşları Azərbaycan Hava Yolları (AZAL) həyata keçirəcək.
Azərbaycanda Həcc ziyarətinin rəsmi təşkilatçısı Qafqaz Müsəlmanları İdarəsidir.
