İlham Əhmədov, Sputnik Azərbaycan
BAKI, 17 may — Sputnik. Sel suları İsmayıllının 7 kəndinə ciddi ziyan vurub. Sputnik Azərbaycan-ın bölgə müxbiri xəbər verir ki, dağlıq ərazidə yerləşən Basqal qəsəbəsinə, Gürcuvan, Xankəndi, Sulut, Zərnava, Köhnədaxar və Zeyvə kəndlərinə güclü dolu düşüb. Nəticədə meyvə bağlarına, əkin sahələrinə, taxıl zəmilərinə ciddi ziyan dəyib.
Gecədən səhərədək yağan güclü leysan səbəbindən yaranan sel suları evlərə, hasarlara ziyan vurub, kəndlərin daxili yollarını dağıdıb, həyətlərdə qalın lil çöküntüləri əmələ gətirib.
Sel suları Basqal-Sulut avtomobil yolunun 8-ci kilometrliyindəki dağ çayı üzərində yerləşən avtomobil körpüsünü dağıdıb. Nəticədə Sulut, Kələzeyvə, Sərsurə kəndlərinin rayon mərkəzi ilə nəqliyyat əlaqəsi kəsilib.
İsmayıllı Lahıc yolu da dünən gecə güclü dolu ilə müaşhidə edilən yağış səbəbindən qaya parçalarının yola düşməsi nəticəsində bağlanıb.
Təbii fəlakət zamanı dəyən ziyan hesablanır.
Hazırda Lahıca gedən yol təhlükəlidir və tez-tez sürüşmə olduğundan mütəmadi olaraq ağır texnika ərazidə hazır vəziyyətdə saxlanılır.
