12:02 20 Aprel 2021
Canlı yayım
  • USD1.7000
  • EUR2.0507
  • RUB0.0223
CƏMİYYƏT
Qısa URL
3510

Proqrama görə, 20:00-21:00-dək Bakı Olimpiya Kompleksi, 21:00-22:00-dək Qız Qalası və Hilton otel işıqlandırılacaq.

BAKI, 22 mart - Sputnik. Martın 24-də saat 20:00-dan 22:00-dək Bakının bir neçə məşhur tikilisi, o cümlədən Bakı Olimpiya Stadionu və 12-ci əsrin tarixi memarlıq abidəsi olan Qız Qalası qırmızı rənglə işıqlandırılacaq.

“Sağlamlığa Xidmət” İctimai birliyindən Sputnik Azərbaycan-a verilən məlumata görə, Ümumdünya Səhiyyə Təşkilatının Dünya Vərəm günü ilə bağlı şüarları ("The clock is ticking" - "vaxt gedir", “End TB” - "Vərəmi dayandıraq") binalar üzərində nümayiş olunacaq.

Proqrama görə, 20:00-21:00-dək Bakı Olimpiya Kompleksi, 21:00-22:00-dək Qız Qalası və Hilton otel işıqlandırılacaq.

Məqsəd diqqəti vərəmlə mübarizəyə yönəltməkdir. Stop TB (“Vərəmə son qoyaq”) tərəfdaşlığı 2017-ci ildən başlayaraq hər il Ümumdünya Vərəmlə Mübarizə Günü ilə əlaqədar dünyanın ayrı-ayrı şəhərlərində yerləşən tarixi memarlıq tikililərinin, əhəmiyyətli binaların “qırmızı rəngə” boyanması aksiyasını keçirir. Bu il Azərbaycan Vərəm əleyhinə QHT Koalisiyası və “Sağlamlığa Xidmət” İctimai birliyi bu aksiyanın ölkəmizdə də keçirilməsinə təşəbbüs göstərib. Bununla da, vərəmdən əziyyət çəkən insanların ağrı və çətinliklərinə diqqət çəkiləcək və onlarla həmrəylik nümayiş olunacaq.

Ümumdünya Səhiyyə Təşkilatının qərarı ilə hər il martın 24-də Ümumdünya Vərəmlə Mübarizə Günü qeyd edilir. 1882-ci ildə alman mikrobioloqu Robert Kox ilk dəfə vərəmin törədicilərini kəşf edib. 1905-ci ildə alim tibb sahəsində Nobel mükafatına layiq görülüb.

1982-ci ildə Ümumdünya Səhiyyə Təşkilatı və Beynəlxalq Vərəm və Ağciyər Xəstəlikləri ilə Mübarizə İttifaqı vərəmin törədicisi olan Kox çöplərinin aşkar edilməsinin 100 illiyi münasibətilə həmin günü təsis ediblər.

Vərəm hava-damcı yolu ilə yayılan xəstəlikdir. Hər il dünyada 10 milyondan çox insan vərəmə yoluxur və 1.5 milyon insan vərəmdən dünyasını dəyişir. Hər gün dünyada 700 uşaq vərəm səbəbilə həyatını itirir, bu da o deməkdir ki, hər üç dəqiqədə bir uşaq vərəmdən dünyasını dəyişir. 2020-ci ilin əvvəllərində bütün dünyada tüğyan edən COVID-19 pandemiyası səbəbilə vərəmlə mübarizə dünyada bir qədər çətinləşib.

Teqlər:
mübarizə, vərəm, qırmızı işıq, Bakı Olimpiya Stadionu, Qız qalası, Bakı

Əsas mövzular