BAKI, 4 iyun — Sputnik. Baş Nazir Əli Əsədovun “Bakı, Sumqayıt, Gəncə, Lənkəran şəhərlərinin və Abşeron rayonunun ərazisində xüsusi karantin rejiminin sərtləşdirilməsi ilə bağlı əlavə tədbirlər barədə” qərarında nəzərdə tutulan iş və xidmət sahələrində fəaliyyət göstərən şəxslər istisna olmaqla, digər şəxslərin 2020-ci il 6 iyun saat 00:00-dan 8 iyun saat 06:00-dək yaşayış yerlərini və ya olduğu yerləri tərk etməsi qadağan edilir.
Sputnik Azərbaycan-ın məlumatına görə, qərarda qeyd olunur ki, onların həmin yerləri tərk etməsinə aşağıdakı müstəsna hallarda icazə verilir:
1.2.1. həyat və sağlamlığa bilavasitə təhlükəli vəziyyət yarandıqda (təxirəsalınmaz tibbi yardım yalnız təcili tibbi yardım xidməti vasitəsilə);
1.2.2. yaxın qohumların dəfnində iştirakla əlaqədar.
Kommunal xidmətlərin (su təchizatı və kanalizasiya, qaz təchizatı, istilik təchizatı, enerji paylanması, məişət tullantılarının yığılması və utilizasiyası) əməkdaşlarının işləməsinə icazə verilsə də, vətəndaşların məişət tullantılarından qurtulmaq üçün evdən çıxması haqda məlumat verilmir.
