15:24 03 Dekabr 2020
Canlı yayım
  • USD1.7000
  • RUB0.0274
  • EUR1.9035
CƏMİYYƏT
Qısa URL
113411

E.Fərzəliyev hesab edir ki, bu gün qanunverciliyə görə, sənədsiz evlərin sökülməsi və ya torpaqların vətəndaşlardan alınması qadağandır

İradə Cəlilova, Sputnik Azərbaycan

BAKI, 30 aprel — Sputnik. "Vətəndaşa məxsus hər hansı tikilinin, o cümlədən torpağın qanunsuz alınması, sökülməsi yolverilməzdir".

Sputnik Azərbaycan xəbər verir ki, bu barədə ombudsman Səbinə Əliyeva Milli Məclisin plenar iclasında çıxışı zamanı qeyd edib.

O, həmçinin sənədsiz evlər, o cümlədən yeni tikilən binalarda kommunal xidmətlərlə bağlı problemlərə toxunub. Ombudsman vurğulayıb ki, hər hansı tikilinin qanunsuz olması yalnız məhkəmə qərarı ilə müəyyənləşə bilər.

Ancaq təəssüflə qeyd etmək lazımdır ki, ötən illərdə İcra Hakimiyyətləri və bəzi dövlət qurumları vətəndaşların razılığı və məhkəmə qərarı olmadan sənədi olmayan ev və iaşə obyektlərini istədikləri zaman sökə bilirdi. Bu, vətəndaşların narazılığına səbəb olsa da, qanunla onların tərəfində dayanan da yox idi.

Əmlak məsələləri üzrə ekspert Elnur Fərzəliyev Sputnik Azərbaycan-a açıqlamasında bildirib ki, təkcə Bakı və Abşeron ərazisində 500 mindən çox çıxarışsız fərdi həyət evi, yüzlərlə çıxarışsız torpaq sahələri və minlərlə yeni tikili binalarda çıxarışsız mənzil var.

Ekspertin fikrincə, bu sahədəki vəziyyətin belə bir həddə çatmasının səbəbi qanunlardakı ciddi boşluqlardır. Çünki istənilən tikili barədə həmin tikinti inşa edilərkən bir neçə səlahiyyətli qurum və yaxud o qurumların səlahiyyətli nümayəndələri xəbərdar olur: "Bu baxımdan belə tikililərə qanunsuz deyil, rəsmi icazəsi olmayan tikililər deyilsə, daha doğru olar. Dəfələrlə sənədsiz mülklərin sənədləşdirilməsi məsələsinin vacibliyi gündəmə gətirilsə də, bir müddətdən sonra bu təkliflər unudularaq kənara atılıb. Hansı ki, zamanında bu sahədə ciddi dəyişikliklər olunsaydı, dövlət büdcəmiz bu çətin günlərdə bu sahədən çox ciddi yararlana bilərdi".

Onun sözlərinə görə, daşınmaz əmlak bazarında ən çox alqı-satqı prosesləri çıxarışsız həyət evləri və çıxarışsız yeni tikili mənzillər üzərindən aparılır.

"Burada itirilən, çıxarışı olmama səbəbindən vergi gəlirlərindən məhrum olan dövlət büdcəsi və vətəndaşlarda dövlətin onların əmlak hüquqlarının qorunmasına dair olan inamıdır. 

Bakı ətrafındakı son 30 ildə salınmış qəsəbələrdəki fərdi həyət evlərinin çox böyük hissəsində çıxarışların olmamasına baxmayaraq, ən çox alqı-satqı prosesləri qiymətlərin ucuz olma səbəbindən həmin ərazilərdə aparılır. Təxmini statistika aparsaq, məlum olar ki, dövlət büdcəsi bu sahədəki boşluqlar və çıxarışların verilməməsi səbəbindən hər il yüz milyonlarla pul itirir" – deyən ekspert bildirir ki, çıxarışların verilməməsinə bir səbəb kimi də zamanında verilmiş tikinti və yaxud torpaq sahələrinin ayrılmasına dair bəzi sərəncamların saxta olmasıdır.

Belə ki, bu gün bəzi MTK-lar tərəfindən saxta sənədlərlə ev satılaraq aldadılmış yüzlərlə vətəndaşlarımız var. Daşınmaz əmlak sektoruna olan bu cür laqeydlik artıq insanlarda bu sahəyə ciddi inamsızlıq yaradıb.

"Həmçinin yeni tikili binaların idarə olumasında da çox ciddi yanlışlıqlar mövcuddur. Əksər MTK-ların qanunun tələblərini pozaraq idarəetməni öz əlində saxlaması kommunal ödənişlərin yüksək olmasına və xidmətlərin aşağı səviyyədə olmasına gətirib çıxarıb. Qanunun tələbinə uyğun olaraq, yeni tikili binalar sakinlərə təhvil verildikdən sonra bina sakinləri öz idarəetmə sistemlərini, yəni Mənzil Mülkiyyətçiləri Müştərək Cəmiyyətini quraraq, binanın bütün idarə etməsini öz üzərilərinə götürməlidirlər", – deyə E.Fərzəliyev bildirib.

Onun sözlərinə görə, bu gün Bakı və Abşeronda 1500-dən çox yaşayış olan yeni tikili binaların olmasına baxmayaraq, hal-hazırda qeydiyyatdan keçmiş MMMC-lərin sayı 170-dən aşağıdır.

Ekspert bildirib ki, idarəetmə sahəsindəki bu problemlərə də ciddi şəkildə baxılmalıdır. Belə ki, bu sahəyə ciddi nəzarətin olması həm kommunal ödənişlərin qiymətlərinin aşağı düşməsinə, həm də daha ciddi xidmətin göstərilməsi ilə nəticələnər.

Əsas mövzular