BAKI, 8 aprel — Sputnik. "Azərbaycan Konstitusiyasının tələbinə görə, Azərbaycan Respublikası Milli Məclisinin yaz sessiyasının 5-ci iclasında Nazirlər Kabinetinin hesabatı dinlənilir. Karantin rejimi ilə əlaqədar olaraq Milli Məclisin sabah keçiriləcək plenar iclasında Baş Nazir Əli Əsədovun videohesabatı dinləniləcək".
Bunu Sputnik Azərbaycan-a Milli Məclisin mətbuat xidmətinin rəhbəri Akif Təvəkküloğlu deyib.
Onun sözlərinə görə, videohesabatdan sonra aparılan müzakirələr zamanı deputatlar tərəfindən səsləndirilən rəy və təkliflər ümumiləşdirilərək Nazirlər Kabinetinə göndəriləcək.
Yaşı 65-i keçmiş deputatların plenar iclasda iştirakına gəlincə, A.Təvəkküloğlu bildirib ki, onlardan xahiş olunub ki, karantin rejiminin qaydalarına əməl etsinlər.
Qeyd edək ki, Milli Məclisin növbəti plenar iclası sabah – aprelin 9-da keçiriləcək, iclasın gündəliyinə altı məsələ təklif olunub.