08:47 03 Aprel 2020
Canlı yayım
  • USD1.7000
  • RUB0.0274
  • EUR1.9035
CƏMİYYƏT
Qısa URL
Azərbaycanın görməli yerləri, turizm obyektləri (36)
72620

Qışı yaşamaq istəyən uzağa deyil, Xızıya gəlib, kiçik bir otaq kirayələyib, gecənin soyuğunu, gündüz günəşinin şüalarını hiss edə bilər

İradə Cəlilova, Sputnik Azərbaycan

BAKI, 5 fevral — Sputnik. Son dəfə Xızıda 2015-ci ildə olmuşdum. Yay fəsli idi. Havanın istisi, dağlar və asfaltdan qalxan bürkü bu rayonu mənə sevdirməmişdi.

Yenidən qərar verdim, yolum Xızıya idi. Bakıdan nə az, nə çox - 104 kilometrlikdə yerləşən bu rayonu bir də qış fəslində görmək istəyirdim.

Rayona daxil olanda dağları qarsız görməyim məni gəlməyimə peşman etmişdi. Amma bir az irəlilədikcə hər tərəfin ağ örpəyə büründüyünə şahid oldum.

Hava soyuq deyildi, amma yerdə qar qalmışdı. Düzdür, yumşaq deyildi, ürək oxşamasa da, göz oxşayırdı. Bəzi yollarda qar qaldığı üçün avtomobil sürüşür, qalxmaq çətinləşirdi.

Qeyd edək ki, Xızı rayonu 1930-cu ildə yaradılıb, 1990-cı ildə isə inzibati ərazi vahidi kimi tanınıb.

© Sputnik / Irade JELIL
Xızı

Xızı müxtəlif yüksəkliklərə malik olan Dübrar, Kimçi, Şərəküş, Bərbəyim, Çıxandağ və Böyük Siyaki dağları ilə digər rayonlardan fərqlənir. Altıağac Milli Parkı Xızıda yerləşir. Park 2004-cü ildə yaradılıb. Parkın 11035 hektar ərazisi var. Altıağacda palıd, vələs, göyrüş, yemişan, zirinc və s. bitkilər var. Parkda əsasən canavar, çöl donuzu, bildirçin, yenot, dovşan, tülkü, dələ, qaratoyuq və s. heyvanlara rast gəlmək olur.

Mütəxəssislərin fikrincə, digər regionlarla müqayisədə qoruğun heyvanları çox azdır. Ancaq qeyd edək ki, Altıağac qoruğunda Azərbaycanın "Qırmızı Kitabı"na daxil edilmiş qonur ayı, çöl qartalı kimi məməli heyvan və quş növləri var.

Tədqiqatçı Alim Cəfərovun sözlərinə görə, Xızıda dağlılar və azərbaycanlılar yaşayırlar.

"Bəzi mənbələrə görə, Xızı Sasanilər dövründən qalıb. Xristianlıqla mübarizə aparmaq və zərdüştlüyün yayılması üçün buraya irandilli tayfalar köçürülüb. Həmin tayfalar Xuzistan əyalətindən olduğu üçün rayonun adı da müxtəlif formalardan keçə-keçə Xızı olaraq qalıb".

© Sputnik / Irade JELIL
Xızı rayonu 1930-cu ildə yaradılıb

Tədqiqatçı bildirir ki, ərazinin çox maraqlı landşaftı var. Dağlar, meşələr, çaylar Xızını əvəzedilməz bir əraziyə çevirib.

"Rayonun 50-dən çox kəndi var. Amma fikir verirsiniz, rayona daxil olanda adama elə gəlir ki, Xızı kiçik rayondur. Əvvəllər Xızıda yollar təmir edilməmişdi. Amma indi ucqar kəndlərə də getmək mümkündür", - deyə tədqiqatçı qeyd edib.

Xızı torpağı Azərbaycan ədəbiyyatına Mikayıl Müşviq, Cəfər Cabbarlı, Cabir Novruz kimi dəyərli söz adamları bəxş edib. Bu gün də Xızıda Cəfər Cabbarlının, Mikayıl Müşviqin ev muzeyləri fəaliyyət göstərir. Qızılqazma kəndinə gedən yol qarlı və buzlu olduğu üçün yola davam edə bilməyib geri qayıdıram.

© Sputnik / Irade JELIL
Rayonun 50-dən çox kəndi var

Xızının əhalisi çox mehribandır. Avtomobili saxlayıb sadəcə ətrafa baxmaq istəsən belə, kimsə yaxınlaşıb, öz köməyini təklif edir.

Qışı yaşamaq istəyən uzağa deyil, Xızıya gəlib, kiçik bir otaq kirayələyib, gecənin soyuğunu, gündüz günəşinin şüalarını hiss edə bilər.

  • Xızı
    © Sputnik / Irade JELIL
  • Xızı
    © Sputnik / Irade JELIL
  • Xızı
    © Sputnik / Irade JELIL
1 / 3
© Sputnik / Irade JELIL
Xızı

Hələ samavar çayı ilə isti təndir çörəyini demirəm. Beyninizin sakitləşməsi, ciyərlərinizin təmiz hava alması üçün Xızıya getmək yetərlidir...

İndi Xızıda iki fəsil var, yaz və qış… Ahəngi görmək üçün yolunuzu Xızıdan salın…

Mövzu:
Azərbaycanın görməli yerləri, turizm obyektləri (36)

Əlaqədar

Tarixin gedişini dəyişənlərin izləri Bakı ətrafında...
Daşa çevrilən qardaşlar – Burada qədim bir abidə yatır - FOTO
Mərmər dağlarının qucağında: onlar kədərlərini başqa şəhərə daşıyırlar - FOTO
Mənşəyi bilinməyən abidə, qəribə ayinli pir - Dini məbəd indi mövhumat ocağına çevrilib
Üzən adanın axtarışında: qarlı Naxçıvana səyahət - FOTO

Əsas mövzular