BAKI, 23 yanvar — Sputnik. Böyük Qala küçəsindəki iki qəzalı binanın restavrasiyası ilin sonuna tamamlanacaq.
Sputnik Azərbaycan xəbər verir ki, bu barədə "İçərişəhər" Dövlət Tarix-Memarlıq Qoruğu İdarəsinin İdarə Heyətinin sədri Əsgər Ələkbərov ötən ilin yekunlarına həsr olunan mətbuat konfransında deyib.
O bildirib ki, Böyük Qala küçəsi 3 və 5 ünvanında iki qəzalı binanın restavrasiyasının bu ilin sonuna kimi tamamlanması planlaşdırılır.
Belə ki, həmin evlərdə yaşayan 17 ailənin hamısı müvəqqəti yaşayış yerləri ilə təmin olunub.
Onun sözlərinə görə, ilin ortalarına qədər Bakı Xanları evində yeni muzey təşkil olunacaq. Muzeydə Bakının orta əsrlərinə virtual səyahət etmək mümkün olacaq. Bundan başqa, Qala Qoruğunda açıq səma altında və antik muzeydə ekspozisiya və sərgilər təşkil olunacaq.
