BAKI, 19 oktyabr — Sputnik. Miss&Mister Planet of Azerbaijan 2019 gözəllik müsabiqəsinin qalibləri Nigar Həsənzadə və Sirac Bəyalızadə Tbilisidə (Gürcüstan) keçirilən Miss&Mister Planet of the World 2019 dünya finalında iştirak edirlər.
Miss&Mister Planet of Azerbaijan-ın direktoru, beynəlxalq dərəcəli münsif Pərviz Əzimzadənin Sputnik Azərbaycan-a verdiyi məlumata görə, Tbilisidə keçirilən müsabiqədə Polşa, Belarus, Ukrayna, İspaniya, Portuqaliya, Rusiya, Bolqarıstan və digər ölkələrdən 24 model iştirak edir.
Azərbaycan nümayəndə heyətinin tərkibinə həmçinin Miss&Mister Planet of the World 2016 və 2018-in qalibləri Yusif Cəfərli və Emil Qasımov, Miss&Mister Planet of Azerbaijan-ın baş direktoru Sadiq Cəfərov da daxildir.
Nigar Həsənzadə və Sirac Bəyalızadə artıq Tbilisi və Gürcüstanın regionlarının görməli yerlərini gəziblər, Imedi TV-nin və Rustavi 2-nin "Georgia's Got Talent" layihəsinin qonağı olublar. Onlar burada milli geyimlərdə Azərbaycanın xalq rəqsi "Uzundərə"ni nümayiş etdiriblər.
Müsabiqənin təşkilatçıları Eka Mqaloblişvili və İrina Papazova Azərbaycan nümayəndələrinin uğur qazanmaq üçün böyük şanslarının olduğunu bildiriblər.
Müsabiqənin finalı oktyabrın 21-də olacaq.
