İradə Cəlilova, Sputnik Azərbaycan
BAKI, 19 sentyabr — Sputnik. "20-ci sahə ilə Badamdar istiqamətinə gedən yolun sol hissəsində olan sürüşmə zonasında gərginlik davam edir. Yəni keçən il vəziyyət necə idisə, elə də qalıb, heç bir dəyişiklik müşahidə olunmur".
Bu barədə Sputnik Azərbaycan-a Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin baş mühəndisi Əziz Qaralov danışıb.
"Yağıntılar başladıqdan sonra sürüşmə kütləsi ağırlaşa bilər və gərginlik güclənə bilər. Biz ötən həftə ərazidə olmuşuq, müşahidə aparmışıq. Ötən il qoyduğumuz mayaklarda, reperlərdə elə bir ciddi dəyişiklik müşahidə edilməyib", - deyə Qaralov bildirib.
Onun sözlərinə görə, yuxarı hissədə kanalizasiya sistemləri də olduğu kimi qalıb və sular təbiətə axıdılır. Bunun nəticəsində isə kütlə ağırlaşır və sürüşmə baş verir.
"Əgər yağıntılar artsa, yamacda asılı qalmış torpaq kütlələri lokal şəkildə sürüşəcək", – deyə o, bildirib.
Qeyd edək ki, Zığ sürüşmə zonası, Masazır "Zəli gölü" ətrafı, Nübar qəsəbəsi ərazisində olan sürüşmə zonalarında vəziyyət stabil olaraq qalır: "Yağışlar mövsümü gəlir. Ancaq yağıntılardan sonra sürüşmə aktivləşə bilər".
