11:58 18 İyun 2019
Canlı yayım
  • USD1.7000
  • RUB0.0264
  • EUR1.9097
Здание парламента Азербайджанской Республики

Bələdiyyələrlə bağlı qanunlar dəyişəcək

© Sputnik / Murad Orujov
CƏMİYYƏT
Qısa URL
23 0 0

"Azərbaycan Respublikası Milli Məclisi deputatının statusu haqqında" və "Bələdiyyələrin fəaliyyətinə inzibati nəzarət haqqında" qanunlarda dəyişikliklərə baxılıb

 

BAKI, 24 may — Sputnik. Mayın 24-də Milli Məclisin Regional məsələlər komitəsinin iclası keçirilib.

Milli Məclisin mətbuat xidmətindən Sputnik Azərbaycan-a verilən məlumata görə, iclasda "Azərbaycan Respublikası Milli Məclisi deputatının statusu haqqında" və "Bələdiyyələrin fəaliyyətinə inzibati nəzarət haqqında" qanunlarda dəyişiklik edilməsi barədə" qanun layihəsinə baxılıb.

Komitə sədri Arif Rəhimzadə bildirib ki, sənəd qanunvericilik təşəbbüsü qaydasında ölkə prezidenti tərəfindən parlamentə daxil olub: ""Azərbaycan Respublikası Milli Məclisi deputatının statusu haqqında" qanunun 16-cı maddəsinin ikinci hissəsinin ikinci cümləsi yeni redaksiyada təqdim edilib. Düzəlişə əsasən, deputat Azərbaycan Respublikası Milli Məclisinin, yaxud onun komitə və komissiyalarının iclaslarında üzrsüz səbəbdən iştirak etmədikdə, habelə Milli Məclisin Daxili Nizamnaməsində nəzərdə tutulmuş digər hallarda həmin Nizamnamə ilə müəyyən edilmiş qaydada parlamentdaxili məsuliyyətə cəlb olunur".

Diqqətə çatdırılıb ki, "Bələdiyyələrin fəaliyyətinə inzibati nəzarət haqqında" qanunun bəzi maddələrinə müddət və qaydaların dəqiqləşdirilməsi ilə bağlı, habelə redaktə xarakterli bir sıra düzəlişlər edilib. Belə ki, 5-ci maddəyə olunan dəyişikliyə əsasən, bu qanunun 6-cı maddəsində nəzərdə tutulmuş aktlar bu qanunun 1-ci maddəsində göstərilən normativ hüquqi aktlara zidd olduqda inzibati nəzarət icraatının başlanması üçün əsas yaradır. Qanunun 8.3-cü maddəsindəki dəyişikliyə görə, inzibati nəzarəti həyata keçirən orqan müraciətin araşdırılması nəticəsində bələdiyyənin fəaliyyətinin qanuna zidd olduğunu aşkar etdikdə, həmin fəaliyyətin dayandırılması və vurulmuş ziyanın aradan qaldırılması barədə 3 gün müddətində müvafiq bələdiyyəyə müraciət edir. Bələdiyyə tərəfindən həmin müraciətə 2 iş günü müddətində bələdiyyə iclasında baxılaraq nəticəsi barədə inzibati nəzarəti həyata keçirən orqana məlumat verir. 8.4-cü maddəyə əsasən isə inzibati nəzarəti həyata keçirən orqan bu qanunun 5.0.1-ci maddəsində nəzərdə tutulmuş hallarda və ya daxil olmuş müraciətin araşdırılması nəticəsində bələdiyyə aktının bu qanunun 1-ci maddəsində göstərilmiş normativ hüquqi aktlara zidd olduğunu aşkar etdikdə, həmin aktın dəyişdirilməsi və ya ləğv edilməsi barədə 3 gün müddətində müvafiq bələdiyyəyə müraciət edir. Bələdiyyə tərəfindən həmin müraciətə 2 iş günü müddətində bələdiyyə iclasında baxılaraq nəticəsi barədə inzibati nəzarəti həyata keçirən orqana məlumat verir.

Qanundakı digər düzəlişlərin mahiyyəti barədə danışan komitə sədri bildirib ki, təklif edilən dəyişikliklərin məqsədi "Normativ hüquqi aktlar haqqında" Konstitusiya Qanununun icrası ilə əlaqədardır.

Deputatlar Fəzail İbrahimli, Tahir Rzayev, Azər Badamov, Kamran Bayramov qanun layihəsi barədə öz fikirlərini açıqlayıblar. Bildirilib ki, göstərilən dəyişikliklər aşkarlıq və operativliyin təmin edilməsi baxımından əhəmiyyətlidir. Bələdiyyələrin səmərəli fəaliyyət göstərməsi üçün əlverişli şərait yaradacaq.

İclasda iştirak edən Sumqayıt Bələdiyyəsinin sədri Sultan Əsədov, Astara Bələdiyyəsinin sədri Aygül Məmmədova da sənədi müsbət qiymətləndiriblər. Qeyd olunub ki, bəhs edilən dəyişikliklər yerli özünüidarəetmə orqanlarının məsuliyyətini daha da artıracaq, çevik işləməyə kömək edəcək, inzibati nəzarəti gücləndirəcək.

Müzakirələrin sonunda dəyişikliklər Milli Məclisin plenar iclasına tövsiyə olunub.

Əsas mövzular