İlham Əhmədov, Sputnik Azərbaycan
BAKI, 5 yanvar — Sputnik. Şamaxıda qəbiristanlıqdan qəbir daşları oğurlanıb. Hadisə rayonunun Yeddi Günbəz qəbiristanlığında qeydə alınıb.
Sputnik Azərbaycan-ın bölgə müxbiri xəbər verir ki, qəbiristanlığın nəzarətçisinin olmaması oğruların işini daha da asanlaşdırıb. Qəbiristanlıqda müxtəlif qəbirlərin ayrı-ayrı hissələri aparılıb. Birindən üstü şəkilli baş daşı və mərmərdən olan sütunlar, digərlərindən sinə daşı, mərmər üzlüklər oğurlanıb. Qəbir sahiblərinə ümumilikdə 1500-1700 manat miqdarında ziyan dəyib.
Hadisə rayon sakini Babək Mirzəzadənin qəbiristanlığa ziyarətə getməsi zamanı aşkar edilib. Babasının məzarının üstündəki sinə daşının oğurlandığını görən Babək Şamaxı Rayonu Polis İdarəsinə məlumat verib. Hadisə yerinə gələn polis əməkdaşları bu oğurluğun ilk olmadığı, oxşar hadisənin ötən ilin noyabr ayının 3-də də qeydə alındığını bildiriblər. O zaman da həmin qəbiristanlıqdan bir neçə qəbir daşları oğurlanıb. Ancaq hadisəni törədən şəxs və ya şəxslər tapılmayıb.
Hələlik oğurluq hadisəsinin kim tərəfindən törədildiyi məlum deyil. Faktla bağlı araşdırma aparılır.
