İlham Mustafa, Sputnik Azərbaycan
BAKI, 5 yanvar — Sputnik. Yevlaxda məskunlaşmış kəlbəcərli məcburi köçkün Ruslan Nəbiyev maraqlı velosiped hazırlayıb. Əsl peşəsi qaynaqçı olan Ruslanın dəmir borulardan istifadə edərək hazırladığı əl işi həm yük götürmə, həm də sürətinə görə müasirlərindən fərqlənir.
33 yaşlı usta ixtirası barədə Sputnik Azərbaycan-ın bölgə müxbirinə danışıb: "İş yerim 3 km məsafədə yerləşir. Yolu pis olduğundan gedib-gəlməkdə çətinlik çəkirdim. Satışda orta qiymətə olan velosipedlər dözümsüz, dözümlüləri isə baha olduğundan qərara gəldim ki, özüm uyğununu hazırlayım".
"Yaxınlıqda yerləşən metal qəbulu məntəqəsindən keyfiyyətli dəmirlərdən seçib başladım hazırlamağa. Hərəkətverici hissələrini düzəldərkən "Jiquli" detallarından istifadə etdim ki, bu da ona xüsusi dözümlülük verir" — R.Nəbiyev bildirib.
Ruslan velosipedin şin, pedal və zəncirindən başqa hamısınını özü düzəldib. Təkər diskiləri hazırlamaq üçün 15 mm-lik borunun 1/3 hissəsini çıxararaq əyib. Çıxardığı hissələri isə diskinin möhkəm olmasını təmin edən çubuqlarla əvəz edərək səkkizguşəli, yaraşıqlı bir təkər hazırlayıb.
Velosiped sürülərkən səkkizguşəli çarx ona xüsusi gözəllik verir. İxtiraçının hazırladığı əyləc sistemi isə daha qeyri-adidir. Belə ki, avtomobil əyləcini xatırladan əyləc, aparıcı zəncir qırıldıqda belə, asanlıqla dayandırıla bilir.
Usta 45 kiloqram çəkisi olan əl işini 550-600 manat müqabilində satın almaq istəyənlərin olduğunu, lakin satmaq istəmədiyini vurğulayıb.
