BAKI, 3 noyabr — Sputnik. Cinayət Məcəlləsinin 202-1-ci maddəsinə (İxrac nəzarətinə aid sənəd və məlumatları yayma) yeni cəza növü — azadlığın məhdudlaşdırılması əlavə edilib.
Sputnik Azərbaycan xəbər verir ki, təklif olunan dəyişikliyə görə, hüquqi və fiziki şəxslərdən alınmış ixrac nəzarətinə aid sənəd və məlumatların və ya onların məzmununun açıqlanması və ya üçüncü şəxslərə verilməsi — 100 manatdan 500 manatadək miqdarda cərimə və ya bir ilədək müddətə islah işləri və ya 1 ilədək müddətə azadlığın məhdudlaşdırılması ilə cəzalandırılır.
Mövcud variantda isə deyilir ki, hüquqi və fiziki şəxslərdən alınmış ixrac nəzarətinə aid sənəd və məlumatların və ya onların məzmununun açıqlanması və ya üçüncü şəxslərə verilməsi — 100 manatdan 500 manatadək miqdarda cərimə və ya bir ilədək müddətə islah işləri ilə cəzalandırılır.
Qeyd edək ki, dəyişiklik oktyabrın 20-də parlamentin iclasında birinci oxunuşda səsə qoyularaq qəbul edilib.
