BAKI, 13 iyul — Sputnik. İctimai Həyatda Gənclərə Dəstək İctimai Birliyi "Təmiz məktəb" layihəsini icra edir. Birlikdən Sputnik Azərbaycan-a verilən məlumata görə, Qazax rayonunda həyata keçirilən layihənin əsas məqsədi ətraf mühitin qorunmasında təhsil müəssisələrinin və orada təhsil alan şagirdlərin rolunu gücləndirmək, onlar arasında ekoloji təfəkkürü artırmaqdır.
Rayondakı II Şıxlı kənd orta məktəbində, Sarivəlli kənd orta məktəbində və Qaratel Hacımahmudova adına natamam orta məktəbdə baş tutan tədbirlərdə ekoloji aksiyalar vasitəsilə məktəbliləri, habelə region əhalisini maarifləndirmək yolları müzakirə edilib. Həmçinin şagirdləri təlimlərdən sonra məktəbin həyətinə meyvə ağacları əkiblər.
Təlimçi Aygün Qurbanova tədbir iştirakçılarına yaşıllıqları artırmaq və qorumaq, ətraf mühitin mühafizəsi, ekoloji mədəniyyətin formalaşmasında cəmiyyətin rolundan danışıb.