BAKI, 20 fev — Sputnik. “Xocalı faciəsi XX əsrin ən ağır nəticələri olan faciələrindən biridir”. Bu sözləri Xocalıda şəhid olmuş 63 uşaqdan bəhs edən “Onlar heç vaxt böyüməyəcəklər” filminin təqdimat mərasimində çıxış edən millət vəkili, Mətbuat Şurasının sədri Əflatun Amaşov söyləyib.
“Azərbaycan parlamentində beynəlxalq cinayətlərin qarşısının alınması və cəzalandırılması ilə bağlı qanun layihəsi hazırlanıb” — deyən millət vəkili qəbul olunacaq qanunun nəinki Azərbaycan, həmçinin müxtəlif xalqların başına gətirilən faciələrin də cəzalandırılmasında önəmli rol oynayacağını qeyd edib. Bildirib ki, təqdim olunan film faciə ilə bağlı araşdırma aparan hüquq-mühafizə orqanları və bu hadisəni digər ölkələrdə soyqırım kimi tanıdan insanlar və təşkilatlar üçün önəmli vasitədir.
Daha sonra çıxış edənlər də Xocalı həqiqətlərinin dünya ictimaiyyətinə çatdırımasında filmin əhəmiyyətini qeyd ediblər.
Qeyd edək ki, filmin müəllifi yazıçı, publisist, Xocalı faciəsinin canlı şahidi Səriyyə Cəfərovadır. Film Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi, Azərbaycan Mətbuat Şurası, Beynəlxalq Avrasiya Mətbuat Fondu və KİV- in təşəbbüsü ilə hazırlanıb.
