BAKI, 30 noy — Sputnik. Cari ilin sonuna Azərbaycanda ÜDM-in həcmi 58,8 mlrd. manat səviyyəsində gözlənilir. Sputnik xəbər verir ki, bu gün, 2017-ci il üzrə dövlət büdcəsinin layihəsinin Milli Məclisdə komitələrin birgə müzakirəsində maliyyə naziri Samir Şərifov belə deyib.
"Bu da ölkədə 2,8% resessiya olacağından xəbər verir. Bu il görülən tədbirlərin 2017-ci ildə də davam etdirilməsi və genişləndirilməsi, makroiqtisadi sabitliyin qorunması əsas hədəflərdəndir", — nazir bildirib.
S. Şərifov qeyd edib ki, gələn ilin dövlət büdcəsində QHT-lərə 3,5 milyon manat, siyasi partiyalara 2,5 milyon manat vəsait ayrılacaq.
Müzakirələrdə iqtisadi siyasət, sənaye və sahibkarlıq, təbii ehtiyyatlar, energetika və ekologiya, aqrar siyasət, müdafiə, təhlükəsizlik və korrupsiya ilə mübarizə, ictimai birliklər və dini qurumlar komitələri iştirak edir.
