Rahim Muradov, Sputnik Azərbaycan
BAKI, 9 aprel — Sputnik. 56 yaşlı Astara sakini bədbəxt hadisə nəticəsində ölüb. Bu gün səhər saatlarında Astara rayonunun Marzəsəy kəndi ərazisində yük avtomobili aşıb.
Sputnik Azərbaycanın bölgə müxbirinin verdiyi xəbərə görə, Astara rayonu Siyaku kənd sakini Sahil Vəliyev Vüqar Aslanovun idarə etdiyi "KAMAZ" markalı yük avtomobili ilə öz evinə mişar daşı aparan zaman bədbəxt hadisə baş verib.
Dağlıq ərazidə yolsuzluq şəraitində nəqliyyat vasitəsi idarəetmədən çıxaraq geriyə gedib və aşıb. Nəticədə yük yerindəki mişardaşların üzərində oturan 1965-ci il təvəllüdlü S.Vəliyev avtomobilin altında qalaraq aldığı xəsarətlərdən hadisə yerindəcə dünyasını dəyişib. Onun meyiti aidiyyəti üzrə təhvil verilib.
Baş verən hadisə ilə bağlı araşdırmalar davam etdirilir.
