BAKI, 1 iyul — Sputnik. Cənub Ərazi Baş Gömrük İdarəsinin Biləsuvar Gömrük postunda İran İslam Respublikasından piyada gələn Azərbaycan Respublikasının vətəndaşı saxlanılıb və yoxlama aparılıb. Sputnik Azərbaycan-a Dövlət Gömrük Komitəsindən verilən məlumata görə, vətəndaşın əl yüklərinə rentgen aparatıyla baxış zamanı monitorda şübhəli əşyaların təsviri görünüb.
Nəticədə bir ədəd zənbildəki qarışıq ərzaq yüklərinin yanında olan iki ədəd yuyucu toz qutularının içərisindən gömrük nəzarətindən gizlədilmiş iki ədəd sellofan bağlamada, ümumi çəkisi 1998,8 qram açıq-qəhvəyi rəngli narkotik vasitə - heroin aşkarlanıb.
