Leyla Abdullayeva, Sputnik Azərbaycan
BAKI, 18 aprel — Sputnik. Şabran rayon sakinini döyüb xəstəxanalıq etdilər.
Hadisə dünən axşam saatlarında baş verib. Sputnik Azərbaycan-ın yerli bürosunun məlumatına əsasən, Şabran rayon Çıraqqala küçəsində yaşayan 28 yaşlı Muradov Rəşid Tahir oğlu dörd nəfər tərəfindən döyülərək xəstəxanalıq olub. Rəşid Muradovun sözlərinə görə, traktorla işdən gələn zaman görüb ki, yolun ortasında iki nəfər dayanıb və onlardan ona yol verməsini xahiş edib. Həmin şəxslər onu təhqir edərək traktoru evə qoyub qayıtmasını tələb ediblər.
Muradov çağırılan yerə getdikdə 8 nəfərin onu əhatəyə aldığını, dördünün isə döydüyünü bildirib. Zərərçəkmiş bildirib ki, onu bıçaqlamaq istəyiblər və “başından vur ölsün” sözünü eşitdikdən sonra huşunu itirərək gözlərini xəstəxanada açıb.
Kəllə-beyin travması alan R.Muradov xəstəxananın reanimasiya şöbəsinə yerləşdirilib.
