İlham Əhmədov, Sputnik Azərbaycan
BAKI, 8 sentyabr — Sputnik. Dünən axşam saatlarından başlayaraq, ölkənin şimal-qərb bölgəsində əsən güclü külək bır sıra fəsadlar törədib. Belə ki, Qaraməryəm-İsmayıllı-Şəki yolunun Oğuz rayonundan keçən hissəsində ağacları aşırıb, budaqlar yola səpələnib, nəticədə yolda tıxacın yaranmasına səbəb olub.
Sputnik Azərbaycan-ın bölgə müxbiri xəbər verir ki, gecə saatlarında aidiyyəti qurumlar yaranan fəsadların aradan qaldırılması istiqamətində müəyyən işlər görsə də, yollarda vəziyyəti tam tənzimləmək mümkün olmayıb. Həmçinin, güclü külək rayonun Sincan, Xaçmaz, Filfilli və Yaqublu kəndlərində də fəsadlar törədib, ağacları kökündən, yaxud budaqlarını qoparıb.
Qasırğa nəticəsində fəsadlar, əsasən Dəymədərə kəndində meydana çıxıb. Burada yaşayış evlərinə ciddi ziyan dəyib. Bəzi yaşayış evlərinin dam örtüyü dağılıb, eləcə də mal tövlələrinin dam örtüyü tamamilə yararsız hala düşüb. Hazırda dəymiş ziyanın araşdırılır.
Kənddəki elektrik naqilləri də ciddi fəsad görüb, xətlər qırılıb, bəzi evlərə verilən elektrik enerjisi kəsilib. Hazırda "Azərişıq" ASC-nin yerli şöbəsi tərəfindən Oğuz rayonunun Qarabaldır, Kərimli, Yaqublu, Qarabulaq və Dəymədərə kəndlərində təmir işləri aparılır və işıq dirəkləri dəyişdirilir, o cümlədən kabellər yenilənilir.
