Şirkətə məxsus yük maşını aşdı, 20 min manatlıq qab qırıldı

BAKI, 29 iyul — Sputnik. Qaradağ rayonunda yol-nəqliyyat hadisəsi baş verib.

"Report"un məlumatına görə, hadisə Bakı-Astara magistralının Ələt qəsəbəsindən keçən hissəsində qeydə alınıb.

Belə ki, Lənkəran rayon sakini Abbas Nurullayevin idarə etdiyi "Jalə" şirkətinə məxsus qoşqulu yük avtomobili hərəkətdə olarkən idarəetmədən çıxaraq aşıb. Sürücünün verdiyi məlumata görə, yük yerində ümumi dəyəri 20 min manat olan boş şüşə qablar sınaraq yararsız hala düşüb.

Qəzaya avtomobilin təkərinin partlaması səbəb olub.

Faktla bağlı araşdırma aparılır.