Yataqxanada baş verən yanğının səbəb və nəticələri bəlli olub

BAKI, 7 iyun — Sputnik. Xəbər verdiyimiz kimi, Bakı şəhəri, Yasamal rayonu, Şərifzadə küçəsində yerləşən məcburi köçkün yataqxanasında yanğın olub. Sputnik Azərbaycan xəbər verir ki, yataqxananın yarı hissəsi tam yararsız hala düşüb.

Əldə etdiyimiz son məlumata görə, hadisə qısaqapanma səbəbindən baş verib. Yanğın nəticəsində 1 nəfər yaşlı qadın tüstüdən zəhərləndiyi üçün təcili xəstəxanaya aparılıb.

Yanğının söndürülməsinə Fövqəladə Hallar Nazirliyinin (FHN) yanğınsöndürən briqadası cəlb edilib. Yanğın söndürülsə də, ara-sıra bəzi mərtəbələrdə yenidən alovlanmalar müşahidə olunur. Hazırda fəsadların aradan qaldırılması üçün işlər görülür.