Rahim Zakiroğlu, Sputnik Azərbaycan
BAKI, 27 okt — Sputnik. Respublikanın cənub zonasında 20 günə yaxındır intensiv yağış yağır. Yağıntının miqdarı Lənkəran-Astara bölgəsində xüsusilə çox olub. Lənkəran Regional Hidrometeorologiya Müəssisəsinin direktoru Cavid Hüseynovun Sputnik-in bölgə müxbirinə verdiyi məlumata görə, düşən yağışın miqdarı aylıq normadan artıq olub.
Hal-hazırda gündüz saatlarında Lənkəranda 10-15 dərəcə, dağlarda 5-10 dərəcə isti qeydə alınır. Gecə saatlarında dağlarda 0-4 dərəcə şaxta olacağı gözlənilir.
Müəssisənin direktorunun verdiyi məlumata əsasən, ay ərzində ən çox yağıntı oktyabrın 12-də Lənkərana qeydə alınıb — 132 mm: "Amma günəşli hava çox uzun sürməyəcək. Belə ki, oktyabrın 28-də günün ikinci yarısından etibarən havanın dəyişəcəyi gözlənilir. Hava buludlu olacaq, yağış yağacaq. Temperaturun 3-5 dərəcə aşağı düşəcəyi ehtimal olunur".
"Yağıntının bəzi yerlərdə intensiv olacağı gözlənilir. Dağlıq və dağətəyi rayonlarda sulu qar və qar yağacağı ehtimal olunur. 30-31 oktyabr tarixlərində küləyin sürəti saniyədə 15-20 metr, bəzi yerlərdə isə saniyədə 23-28 metrədək yüksələcək, çaylarda sululuğun artacağı proqnozlaşdırılır", — C. Hüseynov bildirib.
Onun sözlərinə görə, Lənkəran, Astara rayonlarında kiçik çaylarda daşqın olacağı ehtimalı var: "Cənub bölgəsində ən çox qar Lerik rayonunun mərkəzində qeydə alınıb. Belə ki, qarın hündürlüyü 35 sm təşkil edib. Ən aşağı temperatur 27 oktyabr tarixində Lerik rayonu ərazisində Kəlvəz stansiyasında —4 dərəcə şaxta qeydə alınıb".
Qeyd edək ki, oktyabr ayı cənub zonası üçün ən intensiv yağıntılı keçən ay kimi xarakterizə olunur.
