19:42 17 Yanvar 2021
Canlı yayım
  • USD1.7000
  • RUB0.0232
  • EUR2.0652
TƏHLİL
Qısa URL
19 0 0

"Amerikalılar əvvəlki A-135 sistemində ballistik raket hücumunu dəf edə biləcək böyük bir termonüvə başlığının olduğunu bilirlər. "Nudol" isə daha müasirdir, təxminən 1600 kilometr yüksəkliyə qədər zərbə endirir".

BAKI, 25 dekabr — Sputnik, Nikolay Protopopov. Peyklərin məhv edilməsi, raket əleyhinə müdafiə sisteminin zərərsizləşdirilməsi və kosmosdan dünyaya zərbələr endirilməsi - ABŞ yenə Rusiyanı yerətrafı fəzanı məqsədyönlü şəkildə hərbiləşdirməkdə günahlandırır. Pentaqon Moskvanın bu yaxınlarda sınaqdan keçirdiyi raket əleyhinə nüvə başlıqlarının peykləri məhv etmək məqsədi daşıdığını iddia edir. Bununla belə, amerikalılar özləri orbital silahlar hazırlamaqla bağlı açıqlama vermək istəmirlər. Qərbin "Ulduz müharibələri"nə necə hazırlaşdığı barədə - "RİA Novosti"nin növbəti materialında.

Müdafiə sistemi

ABŞ Kosmik Komandanlığı mütəmadi olaraq Rusiyada peyk əleyhinə raketlərin sınaq buraxılışları haqqında məlumat verir. Sonuncu dəfə ABŞ Müdafiə Nazirliyi bu cür məlumatları aprel ayında təqdim etmişdi. Ümumilikdə, Vaşinqton Rusiyanın "peyk əsaslı" sisteminin səkkiz sınağı barədə informasiya verib.

Aydın məsələdir ki, amerikalılar Pentaqonun PL-19 indeksi ilə təyin etdiyi A-235 "Nudol" raket əleyhinə və kosmik müdafiə sistemini nəzərdə tuturlar. Bu, Rusiya hərbi sənaye kompleksinin ən gizli yeniliklərindən biridir.

"Nudol"un Moskvanı və Mərkəzi Sənaye Bölgəsini əhatə edən A-135 "Amur" raket əleyhinə müdafiə sistemini əvəz edəcəyi ehtimal olunur. Yeni raket əleyhinə sınaqlar 2014-cü ildə Plesetsk poliqonunda başlayıb. A-235-in əsas hədəfləri qitələrarası ballistik raketlərin hücum başlıqlarıdır. Mənzili 1,5 min kilometrdən çoxdur, sürəti 10 Maxa çatır.

"Nudol" döyüş sursatları kosmik raketlər kateqoriyasına aid edilir. Yəqin ki, amerikalılar Rusiyanı kosmosun hərbiləşdirilməsində ittiham etmək üçün bunu əsas götürüblər. Guya PL-19 məqsədli şəkildə yalnız rabitə peyklərinə, orbital fotoçəkilişlərə və digər kosmik obyektlərə yönəldilib. ABŞ hərbçilərinin fikrincə, bu, onların yerətrafı orbitdəki imkanlarını ciddi şəkildə məhdudlaşdırır.

Hərbi ekspert Aleksey Leonkovun fikrincə, ABŞ bu raket əleyhinə sistemdən narahatdır, çünki onun döyüş başlığının işləmə prinsipini tam başa düşmür.

"Onlar əvvəlki A-135 sistemində ballistik raket hücumunu dəf edə biləcək böyük bir termonüvə başlığının olduğunu bilirlər. "Nudol" isə daha müasirdir, təxminən 1600 kilometr yüksəkliyə qədər zərbə endirir. Biz onun döyüş hissəsi barədə məlumatları açıqlamırıq, amerikalılar isə onun termonüvə xarakteri daşıdığını bildirirlər. Mən bunu istisna etmirəm: ABŞ-ın qlobal zərbə konsepsiyası raketlərin kütləvi tətbiqini nəzərdə tutur və buna qarşı nüvə başlığı olan sistemlərə ehtiyac var", – deyə Leonkov bildirir.

Qlobal şəbəkə

Rusiya istiqamətində hücumlar edən amerikalılar özləri də orbitdə hərbi əməliyyatlara hazırlaşırlar. Onların Moskva və Pekin tərəfindən təklif edilən kosmosda silahlara nəzarət üzrə beynəlxalq danışıqlar prosesinə mane olmaq üçün əllərindən gələni əsirgəməmələri isə səbəbsiz deyil.

Rusiya və Çindən qaynaqlandığı iddia edilən təhdidə cavab olaraq Pentaqon "Kosmosda Müdafiə Strategiyası" hazırlayıb. Əsas ideya: düşmən üzərində strateji üstünlük əldə etmək üçün yerətrafı orbiti tutmaq və idarə etməkdir. Strategiya müəlliflərinə görə, bu, döyüş əməliyyatlarının planlaşdırılması və aparılmasında yeni imkanlar açacaq.

İndiyə qədər Amerikanın orbitdəki əsas silahı peyklərdir. Son illərdə Pentaqon buna böyük diqqət ayırdı: həm müdafiə, həm də hücum kosmik gəmilərini fəal şəkildə təkmilləşdirdi.

Bundan başqa, yaxın gələcəkdə ABŞ kiçik kosmik peyklərin kosmosa buraxılmasını planlaşdırır. Məsələn, vahid şəbəkəyə qoşulmuş bir neçə yüz kiçik ölçülü aparatı orbitə çıxarmağı nəzərdə tutan Advanced Research Agency DARPA Blackjack proqramı haqqında məlumat verilib. Pentaqon bunları raketdən müdafiə sistemlərində, eləcə də genişzolaqlı rabitə və ya naviqasiya üçün istifadə edə bilər.

Kosmosdan zərbələr

Pentaqonun "Rusiya və Çinin kosmosdakı təcavüzünün qarşısını almaq" bəhanəsinin arxasında gizlənərək yerüstü fəzaya həqiqi zərbə silahları yerləşdirəcəyi gün uzaqda deyil. Bunu peyk əleyhinə silahların uğurlu sınaqları da təsdiqləyir. Belə ki, 1980-ci illərin ortalarında F-15 qırıcısından atılan bir ASM-135 ASAT raketi 555 kilometr yüksəklikdə "Solwind" elmi peykini vurdu. Və 2008-ci ildə SM-3 sisitemi USA-193 hərbi peykini 250 kilometr yüksəklikdə məhv etdi.

Leonkov qeyd edib ki, son illərdə amerikalılar kosmik silahların iki əsas növü ilə məşğuldurlar: kinetik və energetik. Birincisi, ballistik və hipersəsli raketləri məhv etmək üçün hazırlanıb. Onun göyərtəsində 6-dan 20-yə qədər döyüş başlığı yerləşdirilə bilər.

"Ballistik raketlərin atılması müəyyənləşdirildikdə süni intellekt müstəqil şəkildə hücum qərarı verir və hədəflərin məhv edilməsinə başlanılır. Əlavə olaraq, müvafiq tənzimləmələrlə bu silahlar yerdəki hədəflərə də zərbə endirə bilər" , – deyə ekspert qeyd edir.

Energetik silahlara gəlincə, amerikalı mühəndislər Space-based Lazer proqramı çərçivəsində on səkkiz meqavatlıq kosmik əsaslı kimyəvi lazer üzərində çalışırlar. Kosmosda təxminən iyirmi belə platformanın yerləşdirilməsi planlaşdırılır.

Lazerlərin ballistik və hipersəsli raketləri ələ keçirəcəyi, açıq hava şəraitində isə hətta yerdəki hərəkətsiz obyektləri də vura biləcəyi ehtimal olunur.

Teqlər:
ekspert, RƏM, peyk, kosmos, ballistik raket, raket, Rusiya, ABŞ

Əsas mövzular