BAKI, 25 aprel — Sputnik. Bu gün Qazax Rayon İcra Hakimiyyətinin (RİH) təşəbbüsü ilə Bakı Dövlət Universitetinin Qazax filialında Azərbaycan ədəbiyyatının görkəmli nümayəndəsi, istedadlı nasir, tanınmış ədəbiyyatşünas, pedaqoq və ictimai xadim, Xalq yazıçısı İsmayıl Şıxlının anadan olmasının 100 illiyinə həsr olunmuş elmi-praktik konfrans keçirilib.
Sputnik Azərbaycan-ın bölgə müxbiri xəbər verir ki, filialın Heydər Əliyev auditoriyasında keçirilən konfransda Qazax RİH-in başçısı Rəcəb Babaşov, icra aparatının məsul işçiləri, Xalq yazıçısının övladları, qonaqlardan filologiya elmləri doktoru, professor Rüstəm Kamal, filialın direktoru Arif Rüstəmov və müəllim-tələbə kollektivi, idarə, müəssisə və təşkilat rəhbərləri iştirak ediblər.
Həmçinin, toplantıda görkəmli şəxsiyyət İsmayıl Şıxlının 100 illik yubiley tədbirinin yüksək səviyyədə təşkil olunması məqsədilə rayon rəhbərinin müvafiq sərəncamına əsasən yaradılmış işçi qrupunun üzvləri, ziyalılar, ağsaqqallar, KİV nümayəndələri də təmsil olunublar.
Konfransda Xalq yazıçısının keçdiyi həyat yolu, yaradıcılığı və gördüyü işlərdən danışılıb.
