BAKI, 26 aprel — Sputnik. NTV telekanalı ilə Sputnik İnformasiya Agentliyi və Radiosunun birgə layihəsi olan "Sən supersən!" Beynəlxalq Vokal Müsabiqəsi 2018-ci ilin 10 fevralında start götürüb. Bununla bağlı Sputnik Azərbaycan Multimedia Mətbuat Mərkəzində təşkil edilmiş tədbirdə Azərbaycan təmsilçisi Səməd Novruzov və digər qonaqlar layihədəki iştirakı barədə təəssüratlarını bölüşüblər.
Tədbirdə çıxış edən Azərbaycanın Xalq artisti Flora Kərimova bildirib ki, incəsənətlə məşğul olan şəxslərə onların yaxınları dəstək olmalıdır: "Mən yeni başlayanda oxumaqdan 3 alırdım. Ancaq bu gün Azərbaycanın Xalq artistiyəm. Əgər vaxtında mənə dəstək olmasaydılar, həvəsdən düşərdim və sənətkar ola bilməzdim".
"Bu gün Səmədi dəstəkləmək lazımdır. İnanıram ki, onun daha böyük uğurları olacaq" — F.Kərimova vurğulayıb.
Qeyd edək ki, Azərbaycan təmsilçisi Səməd Novruzov artıq layihədə iştirakını başa çatdırıb.
