07:39 03 Dekabr 2020
Canlı yayım
  • USD1.7000
  • RUB0.0274
  • EUR1.9035
MƏDƏNİYYƏT
Qısa URL
36 0 0

Tədbirdə çoxsaylı ABŞ Dövlət Departamentinin əməkdaşları, Vaşinqtonda akkreditə olunmuş səfirlər və ictimai xadimlər iştirak edib

BAKI, 3 iyul — Sputnik. Amerikanın Beynəlxalq Diplomatik Xidmət Əməkdaşları (The Associates of the American Foreign Service Worldwide) Assosiasiyasının təşkilatçılığı ilə ABŞ Dövlət Departamentinin əsas zallarından biri olan Corc Marşal Auditoriyasında Heydər Əliyev Fondunun vitse-prezidenti Leyla xanım Əliyevanın dəstəyi ilə çəkilmiş "Əli və Nino" filmi nümayiş olunub.

Azərbaycanın ABŞ-dakı səfirliyindən Sputnik Azərbaycan-a verilən məlumata görə, tədbirdə çoxsaylı ABŞ Dövlət Departamentinin əməkdaşları, Vaşinqtonda akkreditə olunmuş  səfirlər və ictimai xadimlər iştirak edib.

Amerikanın Beynəlxalq Diplomatik Xidmət Əməkdaşları Assosiasiyasının proqram direktoru Şeyla Svitzer çıxış edərək filmin Qurban Səidin “Əli və Nino” romanı əsasında çəkildiyini və iki gənc arasında yaşanan sevgi hekayəsindən, eləcə də, Birinci Dünya müharibəsi ərəfəsi və müharibə dövründə Azərbaycanda və eləcə də, ümumilikdə Qafqaz regionunda baş verən hadisələrdən bəhs etdiyini qeyd edib.

ABŞ Dövlət Departamentində Əli və Nino filminin nümayişi
© AZƏRTAC
ABŞ Dövlət Departamentində "Əli və Nino" filminin nümayişi

Amerikanın Beynəlxalq Diplomatik Xidmət Əməkdaşları Assosiasiyasının  prezidenti Coanna Asanasopoulos Oven çıxış edərək “Əli və Nino” filminin ABŞ Dövlət Departamentində nümayiş olunması üçün göstərdiyi dəstəyə görə Azərbaycanın ABŞ-dakı Səfirliyinə minnətdarlığını bildirib. O, Oskar mükafatçısı Asif Kapadianın rejissoru olduğu “Əli və Nino” filminin çəkilişində məşhur beynəlxalq kino ulduzlarının, eləcə də, Mandi Patinkin, Adam Bakri, Maria Valverde və Halit Ergencin yer aldığını diqqətə çatdırıb.

Səfir Elin Süleymanov çıxış edərək “Əli və Nino” filminin ABŞ Dövlət Departamentində nümayiş etdirilməsinin böyük əhəmiyyətə malik olduğunu qeyd edib. O “Əli və Nino” romanının tarixi əhəmiyyətindən danışaraq azərbaycanlı və gürcü olan iki gəncin birgə və azad yaşamaq üçün mübarizə apardıqlarını, Azərbaycanın müstəqilliyi naminə böyük qurbanlar verdiklərini və bunun da hazırkı gənc nəsillər üçün bir nümunə olduğunu vurğulayıb. E.Süleymanov filmdə də göstərildiyi kimi dövlət müstəqilliyin həm Azərbaycan, həm də Gürcüstan xalqı üçün qürur mənbəyi olduğunu bildirərək ABŞ tərəfinin bu amilə xüsusi diqqət yetirməsini tövsiyə edib. Səfir, adıçəkilən roman əsasında çəkilmiş “Əli və Nino” filminin regionumuzdakı milli kimliklərin və onlar arasında qarşılıqlı münasibətlərin başa düşülməsi üçün maraqlı təqdimat rolunu oynaya biləcəyini qeyd edib. E.Suleymanov həmçinin əsərin ərsəyə gəlməsində əməyi keçmiş filmin yaradıcı heyətinə, eləcə də, icraçı prodüser Leyla xanım Əliyevaya dərin təşəkkürünü ifadə edib.

Qeyd edək ki, ABŞ Dövlət Departamentində ilk dəfə olaraq nümayiş etdirilən “Əli və Nino” filmi izləyicilər tərəfindən böyük maraqla qarşılanıb və onlara dərin emosional təsir bağışlayıb.

Əlaqədar

Cəfər Axundzadə: “Əli və Nino” filminə böyük maraq var
"Əli və Nino" filminin uğurları və milli kinomuzdakı tendensiyalar
Əli Əhmədov: Əsas məqsəd azad, şəffaf və demokratik seçkilərdir
Əli Həsənov: Mətbuat daxili və xarici imicin formalaşmasında resursdur
Teqlər:
"Əli və Nino" filminin nümayişi, Amerikanın Beynəlxalq Diplomatik Xidmət Əməkdaşları Assosiasiyası, Azərbaycanın ABŞ-dakı səfirliyi, ABŞ Dövlət Departamenti, Heydər Əliyev Fondu, Elin Süleymanov, Leyla Əliyeva, ABŞ

Əsas mövzular