BAKI, 20 yan — Sputnik. Mədəniyyət və turizm naziri Əbülfəs Qarayevin əmri ilə, İmişli rayon Mədəniyyət və Turizm Şöbəsinin müdiri və Qobustan Milli Tarixi-Bədii Qoruğunun direktoru vəzifələrinə yeni təyinatlar olub. Bu barədə Sputnik-ə Mədəniyyət və Turizm Nazirliyinin (MTN) mətbuat xidmətindən məlumat verilib.
Verilən məlumata görə, Qobustan Milli Tarixi-Bədii Qoruğunun direktoru vəzifəsinə Rüfət Nuriyev təyin edilib. O, bu vəzifəyə təyin edilənədək Mədəniyyət və Turizm Nazirliyinin Tarixi-mədəniyyət abidələrinin istifadəsi və mühafizəsi şöbəsinin müdiri olub.
Nazirliyin və İmişli rayon İcra Hakimiyyətinin birgə qərarına əsasən isə, Nazim Əzimov İmişli rayon Mədəniyyət və Turizm Şöbəsinin müdiri vəzifəsinə təyin olunub. Azərbaycan Respublkası Prezidenti yanında Dövlət İdarəçilik Akademiyasının məzunu olan N.Əzimov bu vəzifəyədək İmişli rayon İcra Hakimiyyəti başçısı Aparatının İctimai-siyasi və humanitar şöbəsinin baş məsləhətçisi vəzifəsində çalışıb.
Mədəniyyət və Turizm Nazirliyinin İnformasiya və ictimaiyyətlə əlaqələr şöbəsinin müdiri Vüqar Şixəmmədov Trend-ə yeni təyinatlarla bağlı məlumatları təsdiqləyib.
Xatırladaq ki, İmişli rayon Mədəniyyət və Turizm Şöbəsinin müdiri Süleyman Bəşirov ötən ilin sonunda şöbənin fəaliyyətini lazımi səviyyədə qura bilmədiyinə, vəzifəsinə məsuliyyətsiz yanaşdığına və nazirliyin qərarlarının icrasını təmin etmədiyinə görə vəzifəsindən azad olunmuşdu. Müvafiq qanunvericiliyin tələbi nəzərə alınaraq, 65 yaşının tamam olmasına görə Zərdab rayon Mədəniyyət və Turizm Şöbəsinin müdiri Eldəniz Abdullayev də vəzifəsindən azad edilib. Qobustan Milli Tarixi-Bədii Qoruğunun direktoru Məlahət Fərəcova isə öz ərizəsi ilə vəzifəsindən azad olunmuşdu.
