Təranə Xudabaxşiyeva, Sputnik Azərbaycan
BAKI, 21 iyun — Sputnik. Uzunmüddətli hazırlıq prosesi və gərgin çalışmalardan sonra, nəhayət ki, paytaxt Bakıda Formula 1 Avropa Qran-Prisi baş tutdu. Hazırlıqlar yüksək səviyyədə həyata keçirilmişdi. Komandalar üçün xüsusi yerlər və bolidlərin saxlanması üçün düzəldilən qarajlar göz oxşayırdı.
İşçi heyətinin həyəcanı simalarından hiss olunsa da, jurnalistlərin üzünə gülümsəyərək həyəcanlarını gizləməyə çalışırdılar. Dünyanın müxtəlif ölkələrindən gələn jurnalistlər də yarışmanı operativ və daha geniş şəkildə dünyaya çatdırmaq üçün var gücləri ilə çalışırdılar.
Formula 1-ə dəstək xarakterli GP2 yarışması da uğurlu sayıla bilər. Amma etiraf etmək lazımdır ki, GP2 Formula 1 qədər nə məşhurdur, nə də tamaşaçılar tərəfindən ona maraq güclüdür. Qeyd edək ki, Bakıda keçirilən Formula 1-də yarışan bolidlərin maksimal sürəti saatda 360 km təşkil edirdi.
Yerli əhalinin və xarici turistlərin yarış günlərində asudə vaxtlarını səmərəli keçirmələri üçün, Dənizkənarı Milli Parkda müxtəlif əyləncə məkanları qurulmuşdu. "F1 kəndi" adlanan ərazidə yaradılan əyləncə məkanları insanlara gözəl anlar yaşadırdı. "F1 kəndi"ndə 3D ilə yerdə çəkilən şəkil hamının marağına səbəb olurdu.
Burada milli adət-ənənələrimizi qoruyan kiçik guşədə milli geyimlərimizi tapmaq olardı. Kəlağayılar, milli geyimlər, papaqlar, xurcunlar turistlərin marağını cəlb etmişdi. Eyni zamanda rəssam xanımlar yarışa baxmağa gələnlərin üzlərinə xınadan rəsmlər çəkirdilər.
Əyləncə məkanında xüsusi musiqi səhnəsi də qurulmuşdu. Burada yerli musiqi qruplarının səsləndirdiyi mahnılar turistlərin marağını çəkirdi. Əyləncə məkanında hər kəs simulyatorlarda Formula 1 həyəcanını özü yaşaya bilirdi.
Sadəcə bir "əmma" var idi. Belə ki, simulyator sürmək istəyən insan, bunun üçün, Formula 1-də iştirak edən komandaların brend geyimlərini satan satış guşələrindən, ən azı 60 manatlıq alış-veriş etməli idi. Həmin dükanlarda ən ucuz geyim "kepka" idi — 25 manata. Əksər geyimlərin qiyməti 50-900 manat arasında dəyişirdi.
Digər hissədə axşam əyləncəsi üçün böyük səhnə qurulmuşdu. İnsafla demək lazımdır ki, hər kəs mədəni istirahətini edir, heç kim digərinə mane olmurdu. Eyni zamanda, pilotlar fərqli zamanlarda pərəstişkarları ilə görüşüb, avtoqraf verirdilər.
Axşam konsertlərinin başlanma saatı biletlərdə 20:00 göstərilsə də, konsert 21:30-da başladı. Kris Braun, Enrike İqlesias və Farrell Uilyamsın konserti maraqla qarşılandı və uğurlu keçdi. Hər kəs mənəvi zövq alırdı.
Formula 1 bayramı xaricilərin Bakıya olan marağını da artırıb. Sputnik əməkdaşı ilə söhbət zamanı yapon turist Formula 1 idman növünü çox sevdiyini və fürsət düşdükcə, bütün yarışları izlədiyini bildirdi.
Ümumiyyətdə xarici turistlərin bu idman növünə böyük maraq göstərdiyinin şahidi olduq. Ümumilikdə Formula 1 səviyyəsinə görə digər yarışlardan fərqlənirdi. Bu idman növünün izləyicilərinin daha sakit və intellektual olduqlarını hiss etmək çox da çətin deyildi.
Yarışın açılış mərasimi də fərqli və gözəlliyi ilə bu yarışın tarixinə düşə bildi. Adətən Formula 1 yarışlarının açılışı qısa və proqramsız olur. Bakıda keçirilən Formula 1 Avropa Qran-Prisinin açılış proqramında isə milli atributlardan, klassik musiqilərimizdən istifadə olundu və bununla bir daha Azərbaycan həqiqətlərini dünyaya çatdıra bildik.
