Azərbaycan Blinkenə niyə yox dedi?

BAKI, 6 dekabr — Sputnik. Dekbarın 5-də Ermənistan Xarici İşlər Nazirliyi məlumat yaydı ki, ATƏT Xarici İşlər Nazirləri Şurasının Maltada keçirilən 31-ci iclasında Azərbaycan və Ermənistanın xarici işlər nazirləri Ceyhun Bayramov və Ararat Mirzoyan arasında görüş keçirilməsi nəzərdə tutulmur.

Diplomatik mənbələr bildirilib ki, ABŞ dövlət katibi Entoni Blinken ATƏT Xarici İşlər Nazirləri Şurasının iclası çərçivəsində Azərbaycan və Ermənistan xarici işlər nazirlərinin görüşünün keçirilməsi təşəbbüsü ilə çıxış edib. Blinken bu görüşün baş tutması üçün israrla vasitəçilik etmək istəyib, lakin Azərbaycan tərəfi Blinkenin görüşün keçirilməsi təklifindən qəti imtina edib.

Diplomatik təmaslara baxmayaraq Azərbaycan-ABŞ münasibətlərinin hazırkı səviyyəsi tarixinin ən pis dövrlərindən birini yaşayır desək yanılmarıq. Ötən ay Bakıda keçirilmiş COP29-la bağlı Azərbaycana qarşı atılan addımlar rəsmi Bakı tərəfindən hiddətlə qarşılanırdı. Xüsusəndə tədbirdən öncə ABŞ-ın nəzarətində olan beynəlxalq təşkilatların, o cümlədən amerikalı konqresmenlərin Blinkenə müraciəti münasibətləri kəskinləşdirən əsas hadisələr sırasında idi. Bütün bu baş verənlərdən sonra fəaliyyəti başa çatmaq üzrə olan demokratlar administrasiyasının Cənubi Qafqazda sülh üçün əl-ayağa düşməsi faydasız olacağı gözlənilən idi. Görünən odur ki, rəsmi Bakı yeni ABŞ administrasiyası ilə fərqli diplomatik münasibətlərin qurulacağına və ABŞ-ın Cənubi Qafqaz siyasətində Azərbaycana qarşı mövqeyini yumşaldacağını gözləyir. Çünki Tramp rəhbərliyindəki yeni hökumətdə təmsil olunacaq şəxslər zaman-zaman Azərbaycan əleyhinə fəaliyyətləri ilə yadda qalmış şəxslərdir. Bu baxımdan münasibətlərdə tez bir zamanda kəskin dönüş olacağını gözləmək də xəyal qırıqlığı yarada bilər.

Mövzu ilə bağlı Sputnik Azərbaycan-a danışan millət vəkili Elman Nəsirov bildirib ki, bunun konkret səbəbləri var və bu birbaşa olaraq Bayden administrasiyasının Azərbaycana yönəlik siyasəti ilə bağlıdır:

"Azərbaycan prezidenti dəfələrlə bildirib ki, Ermənistanla birbaşa danışıqların tərəfdarıyıq. Biz vasitəçilik missiyasının nələr gətirib çıxardığının fərqindəyik. Bir çox hallarda vasitəçilik etmək istəyənlər öz geostrateji niyyətlərini ortaya qoyurlar".

Millət vəkili bildirib ki, Azərbaycan nəzakət diplomatiyasını nəzərə alaraq bir sıra dövlətlərin vasitəçi deyil, təşkilatçı qismində bu prosesə qatılmasına yox demir:

Politoloq Samir Hümbətov isə bildirir ki, Azərbaycan nə vaxtsa sülh təşəbbüslərinə yox deməyib, əksinə bütün platformalarda sülhün əldə olunması üçün imkanları səfərbər edib.

Onun sözlərinə görə, Blinkenin təklifi tələsik hansısa sazişə nail olmaq məqsədi güdür:

"Onlar seçkilərdə məğlub olmuş demokratların nüfuzu üçün nəyəsə nail olmaq istəyirlər. Azərbaycana isə görüntü yox, praktiki sənəd lazımdır".

Politoloq hesab edir ki, Azərbaycan boş-boşuna sənəd imzalamaq istəmir. Azərbaycanın təklifi odur ki, ya real nəticə ortaya qoyaq, yoxsa, bu cür danışıqlar zaman itkisidir.