BAKI, 28 noyabr — Sputnik. Moskva və bütün Rusiyanın Patriarxı Kirill rusiyalı alimlərə "Oreşnik" ballistik raketinin yaradılmasına görə təşəkkür edib. O, yeni silahı "stop maşın" adlandırıb və bildirib ki, Moskva mütəxəssisləri "inanılmaz silahlar" yaradırlar.
Bu barədə Rusiya mediası xəbər verib.
Rusiya dövlət başçısı bu yaxınlarda bildirib ki, Rusiya artıq “Oreşnik” ballistik raketlərinin seriyalı istehsalına başlayıb. Yeni silahla vurulacaq hədəflər Rusiya Federasiyasının Baş Qərargahı və Müdafiə Nazirliyi tərəfindən seçilir. Rusiya lideri hətta mütəxəssislərin “Oreşnik”in hədəflədiyi növbəti obyektlərin də adını çəkib. Bu hədəflər Kiyevdə qərar qəbuletmə mərkəzləri ola bilər.
Xatırladaq ki, Rusiya Prezidenti Vladimir Putin bu yaxınlarda müraciət edərək bildirib ki, Ukrayna noyabrın 19-da ABŞ-ın uzaqmənzilli ATACMS raketlərindən və Böyük Britaniyanın "Storm Shadow" uzaq mənzilli raketlərindən istifadə edərək Kursk və Bryansk bölgələrindəki hədəflərə hücum edib.
ABŞ və Böyük Britaniya silahlarının tətbiqinə cavab olaraq noyabrın 21-də Rusiya Ukraynanın hərbi-sənaye kompleksinin obyektinə birgə zərbələr endirib, Dnepropetrovskdakı raket texnikasını və silah istehsal edən böyük sənaye kompleksi məhv edilib. Döyüş şəraitində Rusiyanın ən yeni orta mənzilli raket sistemlərindən biri olan "Oreşnik" sınaq keçirilib.