BAKI, 19 noyabr — Sputnik. Ukraynalıların əksəriyyəti münaqişənin tezliklə bitməsini və danışıqların başlanmasını istəyir.
Bununla bağlı "Gallup" sorğusunun məlumatları sübut edir.
Belə ki, 2024-cü ilin avqust və oktyabr aylarında aparılan sorğuya əsasən, ölkə sakinlərinin təxminən 52%-i Kiyevin danışıqlar prosesinə mümkün qədər tez başlamasını istəyir. Üstəlik, 2022-ci ildə ukraynalıların təxminən 22%-i, 2023-cü ildə isə sorğuda iştirak edən vətəndaşların 27%-i oxşar cavab verib.
Bununla yanaşı, 2022-ci ildən etibarən silahlı mübarizənin davam etdirilməsini zəruri hesab edənlərin sayı azalmaqdadır. 2022-ci ildə vətəndaşların 73%-i, 2023-cü ildə 63%-i hərbi əməliyyatların davam etdirilməsinin tərəfdarı olub, 2024-cü ildə isə respondentlərin cəmi 38%-i hadisələrin bu cür inkişafını dəstəkləyib.
Bu yaxınlarda Kiyev Beynəlxalq Sosiologiya İnstitutunun sorğusunun nəticələri göstərib ki, ukraynalıların üçdə biri münaqişənin həlli üçün Rusiyaya ərazi güzəştlərinə getməyə razıdır. Eyni zamanda, araşdırma ukraynalıların əksəriyyətinin ərazi güzəştləri ideyasını dəstəkləmədiyini də göstərib.