BAKI, 1 noyabr — Sputnik. Ankara Rusiya Federasiyası, Çin və Cənubi Koreya ilə Türkiyədə yeni atom elektrik stansiyalarının tikintisi ilə bağlı danışıqları davam etdirir və nüvə yanacağı istehsal etməyi gözləyir. Bunu Türkiyənin energetika naziri Alparslan Bayraktar bildirib.
Nazir qeyd edib ki, yaxın 20 ildə Türkiyə hər biri dörd enerji bloku olan üç atom elektrik stansiyasını - cənubda Akkuyu, eləcə də ölkənin şimalında Sinop və qərbdə Trakiyada AES-i istifadəyə verməli olacaq.
"Dünyada atom elektrik stansiyalarının tikintisi ilə məşğul olan şirkətlər çox deyil, bizim bunu müzakirə etdiyimiz ölkələrin sayı məhduddur. Biz bu məsələni Rusiya, ÇXR və Cənubi Koreya ilə müzakirə edə bilərik... Biz hər üç ölkə ilə danışıqlar aparırıq. Əsas məqsədimiz mümkün qədər ucuz qiymətə atom elektrik stansiyası tikməkdir. Biz onlara Türkiyədə birlikdə nüvə yanacağı istehsal etməyi təklif edəcəyik", - nazir bildirib.
Bayraktar iyulda bildirib ki, Türkiyə 2025-ci ildə iki atom elektrik stansiyasının tikintisinə dair saziş imzalamağı gözləyir, Akkuyu və Türkiyənin planlaşdırdığı yeni atom elektrik stansiyaları 2053-cü ilə qədər Türkiyənin elektrik enerjisinə ehtiyacının 30%-ni qarşılayacaq.
Moskva hesab edir ki, Rusiyanın Sinop AES-in tikintisində iştirakının parametrlərini razılaşdırmaq olarsa, bundan hər iki tərəf faydalanacaq, cümə günü Rusiyanın xarici işlər naziri Sergey Lavrov bildirib.
Türkiyə prezidenti Rəcəb Tayyib Ərdoğan 2024-cü ilin iyulunda Astanada ŞƏT sammiti çərçivəsində Rusiya prezidenti Vladimir Putinlə görüşdə qeyd edib ki, Ankara və Moskva yeni layihənin detallarını müzakirə edirlər. "Rosatom"un baş direktoru Aleksey Lixaçov öz növbəsində dövlət korporasiyasının Sinop AES-in tikintisinin baş podratçısı kimi baxıldığını bildirib.
Hazırda Türkiyədə Rusiyanın iştirakı ilə ölkənin ilk atom elektrik stansiyası olan Akkuyu tikilir. O, Rusiya istehsalı olan qabaqcıl VVER-1200 3+ reaktorları olan dörd enerji blokundan ibarətdir. Hər bir enerji blokunun gücü 1200 meqavat olacaq. Akkuyu AES-in tikintisi qlobal nüvə sənayesində "Tik-sahib-işlət" modelindən istifadə edilməklə həyata keçirilən ilk layihədir.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.