BAKI, 30 oktyabr — Sputnik. Dekabrın sonunda Sankt-Peterburqda MDB dövlət başçılarının qeyri-rəsmi sammiti keçiriləcək. Bu barədə jurnalistlərə MDB-nin baş katibi Sergey Lebedev məlumat verib.
"Noyabrın 28-də Astanada KTMT dövlət başçılarının görüşü, dekabrın sonunda isə MDB dövlət başçılarının ənənəvi qeyri-rəsmi görüşü baş tutacaq", - Lebedev bildirib.
MDB ölkələrinin liderləri arasında digər beynəlxalq platformalarda təmaslara gəlincə, Lebedev BRİKS-in Kazanda keçirilən sammitini xatırladıb.
"Burada bir çox ikitərəfli görüşlər, o cümlədən Azərbaycan prezidenti ilə Ermənistanın baş naziri arasında görüş keçirilib", Lebedev qeyd edib.
Baş katib onu da qeyd edib ki, MDB onun tərkibinə daxil olan bütün dövlətlərin maraqlarına uyğun fəaliyyət göstərir və inkişaf edir. Baş katib əlavə edib ki, kollektiv Qərbin apardığı siyasətə baxmayaraq, MDB ölkələrinin iqtisadiyyatı zərər görməyib, qarşılıqlı ticarətin həcmi artır.
Əvvəllər Rusiya dövlət başçısı Vladimir Putin belə qeyri-rəsmi sammitləri dostluq mühitində görüşlər kimi xarakterizə edib, burada regional və beynəlxalq işgüzar gündəmin müzakirəsi aparılıb.