BAKI, 28 oktyabr — Sputnik. Moskva Gürcüstanın hakimiyyət nümayəndələri ilə əlaqələrin genişləndirilməsi ilə bağlı mümkün təklifləri nəzərdən keçirməyə hazırdır. Bu barədə Rusiyanın xarici işlər naziri Sergey Lavrov Moskvada keçirdiyi mətbuat konfransında bildirib.
O, xatırladıb ki, Gürcüstanla Rusiya arasında diplomatik münasibətlər yoxdur, çünki onlar əvvəlki Gürcüstan rəhbərliyi tərəfindən dayandırılıb. Bununla belə, hər iki ölkənin ərazisində İsveçrə səfirliyində maraqlar bölməsi şəklində nümayəndəliklər fəaliyyət göstərir. Rusiya diplomatları bu vəzifədə Tbilisidə fəaliyyət göstərirlər.
"Onlar əlaqələrin, o cümlədən ticarət-iqtisadi əlaqələrin inkişafına kömək edir", - Lavrov qeyd edib.
Rusiya XİN rəhbəri əlavə edib ki, rusiyalı diplomatlar yaranan məsələləri Gürcüstan hakimiyyətinin nümayəndələri ilə müzakirə edirlər.
"Gürcüstanlı qonşularımızdan təmaslarla bağlı əlavə təkliflər olarsa, biz onları nəzərdən keçirəcəyik", - Lavrov bildirib.
Bundan əvvəl Gürcüstanın baş naziri İrakli Kobaxidze bildirib ki, Gürcüstanın Rusiya ilə diplomatik münasibətləri bərpa etmək planı yoxdur. Kobaxidze əlavə edib ki, Moskva ilə diplomatik danışıqların aparılması ehtimalı var.
Bununla belə, onun sözlərinə görə, Tbilisi üçün Avropaya inteqrasiya və Aİ ilə münasibətlərin normallaşdırılması prioritet olaraq qalır.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.