BAKI, 25 oktyabr — Sputnik. Rusiya Şimali Koreya ilə bütün mümkün sahələrdə əlaqələri çox fəal şəkildə inkişaf etdirir. Bunu Rusiya prezidentinin mətbuat katibi Dmitri Peskov deyib.
"Koreya Xalq Demokratik Respublikası (KXDR) bizim qonşumuzdur və biz bütün mümkün sahələrdə əlaqələri çox fəal şəkildə inkişaf etdiririk", - diplomat bildirib.
Dmitri Peskov həmçinin Şimali Koreya lideri Kim Çen Inın 2025-ci ildə Rusiyaya səfərinin mümkünlüyünü şərh edərkən yaxın qonşu ölkələrin daim yüksək və ali səviyyədə səfərlər mübadiləsi apardıqlarını da söyləyib.
"Əlbəttə ki, yaxın qonşular yüksək və ali səviyyədə davamlı səfərlər mübadiləsi həyata keçirirlər", - Peskov vurğulayıb.
Rusiya Federasiyası Prezidentinin mətbuat katibi Dmitri Peskov
© Sputnik / Александр Щербак
Kim Çen In Rusiyaya iki dəfə səfər edib. 2019-cu ildə Rusiya Federasiyası və KXDR liderləri arasında danışıqlar Vladivostokda baş tutub, 2023-cü ildə isə Rusiya Prezidenti Vladimir Putin və Kim Çen In birgə Amur vilayətindəki "Şərq" kosmodromuna səfər ediblər.
2024-cü ilin iyununda Putin Şimali Koreyaya dost dövlət səfəri edib. Səfər zamanı onlar səhiyyə, tibbi təhsil və elm sahəsində əməkdaşlıq haqqında hökumətlərarası saziş, Tumannaya çayı üzərindən sərhəd avtomobil körpüsünün tikintisinə dair saziş, habelə hərtərəfli strateji tərəfdaşlıq haqqında yeni müqavilə bağlayıblar. Bu sənəd Rusiya Federasiyası ilə KXDR arasında 9 fevral 2000-ci il tarixli dostluq, mehriban qonşuluq və əməkdaşlıq haqqında əsas müqaviləni əvəz etmək üçün nəzərdə tutulub. Yeni müqavilənin müddəti qeyri-məhdud olacaq. O, təsdiqlənməlidir və ratifikasiya sənədlərinin mübadiləsi tarixindən qüvvəyə minəcək.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.