BAKI, 20 oktyabr — Sputnik. Avrasiya İqtisadi İttifaqının (Aİİ) İşgüzar Şurası Çin Beynəlxalq Ticarətin Təşviqi Komitəsi ilə Aİİ və ÇXR arasında işgüzar dialoqun yaradılmasını nəzərdə tutan əməkdaşlıq memorandumu imzalayıb.
Bu barədə "TASS"a Aİİ İşgüzar Şurasının rəyasət heyətinin üzvü, icraçı katib Sergey Mixneviç məlumat verib.
Onun sözlərinə görə, sənədi Rusiya Sənayeçilər və Sahibkarlar İttifaqının prezidenti, Aİİ İşgüzar Şurasının Rəyasət Heyətinin üzvü Aleksandr Şoxin və Çin Beynəlxalq Ticarətin Təşviqi Komitəsinin sədr müavini Çjan Şaoqan imzalayıblar.
"Memoranduma uyğun olaraq, "Aİİ - ÇXR" daimi işgüzar dialoq yaradılmışdır. Yaradılan institutun əsas vəzifəsi Aİİ və ÇXR-ə üzv ölkələr arasında biznesin tənzimlənməsi və şərtləri ilə bağlı informasiya mübadiləsinin qurulmasından tutmuş mövcud məhdudiyyətlərin aradan qaldırılmasında, biznes icmalarının maraqlarının təbliğində, işgüzar tədbirlərin təşkilində, texnologiya və nou-hau mübadiləsinin təşviqində, qarşılıqlı investisiyaların stimullaşdırılmasında praktiki yardıma qədər geniş çeşidli vasitələrdən istifadə etməklə işgüzar əlaqələrin inkişafını stimullaşdırmaqdır" - Mixneviç bildirib.
Onun sözlərinə görə, memorandumun məqsədlərini həyata keçirmək üçün mövcud məhdudiyyətlərin müəyyən edilməsi ilə bağlı məsələlərin öyrənilməsini, ticarət-iqtisadi əlaqələrin və əməkdaşlığın inkişafı üçün təkliflərin hazırlanmasını özündə əks etdirən birgə iş planı hazırlanacaq. Bundan əlavə, Aİİ və Çin arasında əməkdaşlıq imkanları və şərtləri haqqında biznes məlumatlılığının artırılmasına yönəlmiş tədbirlərin hazırlanması planlaşdırılır.
Mixneviçin qeyd etdiyi kimi, Rusiya Sənayeçilər və Sahibkarlar İttifaqının 2025-ci ildə Şimal-Şərqi Asiya Biznes Assosiasiyasında qarşıdan gələn sədrliyi çərçivəsində onun gündəliyindəki bəndlərdən biri Aİİ-də Biznes Şurası üzrə tərəfdaşlarla əlaqələrin inkişafı olacaq.
Gözlənilir ki, yeni mexanizmin tammiqyaslı işə salınması biznesin Aİİ üzv ölkələri ilə Çin arasında ticarət-iqtisadi və investisiya əməkdaşlığında iştirakını genişləndirməyə kömək edəcək. Bu, Mixneviçin fikrincə, böyük Avrasiya regionunda biznes əlaqələrinin şaxələndirilməsinə töhfə verəcək.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.