BAKI, 11 oktyabr — Sputnik. AYNA xarici vətəndaşların "AzParking" mobil tətbiqindən ödəniş etmələrində yaranan çətinliklə bağlı yayılmış məlumatlara münasibət bildirib.
Sputnik Azərbaycan-ın sorğusuna AYNA-dan verilmiş cavabda bildirilib ki, xarici vətəndaşların parklanma məntəqəsindən istifadəsində hər hansı bir məhdudiyyət yoxdur.
Qeyd edək ki, sosial şəbəkələrdə xarici vətəndaşların "AzParking" mobil tətbiqindən istifadə zamanı kartla ödəniş edə bilmədiyinə dair məlumatlar yayıkıb. Bildirilir ki, əcnəbilər parklanma üçün Azərbaycan mobil operatorundan nömrə almalıdırlar.
AYNA-dan isə bildirilib ki, rəqəmsallaşmanın və istifadə rahatlığının təmin edilməsi məqsədilə parklanmaya görə ödənişlər yalnız nağdsız qaydada həyata keçirilir. Xarici vətəndaşların parklanma məntəqəsindən istifadəsində hər hansı bir məhdudiyyət yoxdur.
"Ödənişləri həyata keçirmək üçün sürücülərə 2 müxtəlif üsul təqdim olunur – "AzParking" mobil tətbiqi və sms vasitəsilə. Ən asan yolu mobil tətbiqi App Store və Google Play-dən yükləmək olar. Mobil tətbiq üzrərindən viza və mastercard olan istənilən kartla ödəniş etmək mümkündür" - cavabda bildirilib.
SMS vasitəsilə ödəniş etmək istəyənlər isə avtomobilin dövlət qeydiyyat nişanı və parklanma məntəqəsinin nömrəsini "1181" qısa nömrəsinə göndərməlidirlər.
Digər maraqlı xəbərləri həmçinin Sputnik Azərbaycan-ın Teleqram kanalından izləyin