BAKI, 10 oktyabr — Sputnik. Nobel Sülh Mükafatını almaq üçün ən böyük şanslar Yaxın Şərqdə vəziyyətin növbəti gərginləşməsi fonunda seçilən iki təşkilatındır: söhbət bu sahədə BMT-nin Yaxın Şərqdəki Fələstinli Qaçqınlara Yardım Agentliyi (UNRWA) və Beynəlxalq Ədalət Məhkəməsindən gedir. Bu barədə "Financial Times" nəşri ekspertlər arasında sorğu keçirərək belə qənaətə gəlib.
Sentyabr ayında UNRWA İsrailin Qəzza zolağının mərkəzindəki Nuseyrat qaçqın düşərgəsindəki keçmiş məktəbə iki hava hücumu nəticəsində altı əməkdaşının öldüyünü bildirmişdi. Son bir il ərzində bölgədə təşkilatın 200-dən çox əməkdaşı yaralanıb və ya həlak olub.
Nəşrin məlumatına görə, BMT-nin baş katibi Antonio Quterreş, sahibkar İlon Mask və WikiLeaks platformasının təsisçisi Culian Assanj da mükafatı almaq şansına malikdir.
Mükafatlandırma mərasimi oktyabrın 11-də baş tutacaq.
Nobel Sülh Mükafatı xalqlar arasında qarşılıqlı anlaşmanın möhkəmləndirilməsinə, daimi orduların sayının azaldılmasına və sülh təşəbbüslərinin təşviqinə əhəmiyyətli töhfə verən şəxsə verilir. Mükafat parlament tərəfindən təyin edilmiş beş üzvdən ibarət Norveç Nobel Komitəsi tərəfindən verilir. Komitə müstəqil qərarlar qəbul edir.
2023-cü ildə mükafatı iranlı hüquq müdafiəçisi Narges Mohammadi alıb. Mükafat ona "qadınlara zorakılığa qarşı mübarizəsinə" və "hər kəs üçün insan hüquq və azadlıqlarının təşviqinə" görə verilib. Düzdür, xanım Mohammadi mükafatı şəxsən ala bilməyib: o, bir sıra ittihamlarla, o cümlədən "dövlət əleyhinə təbliğat" aparmaqda ittiham olunaraq ölkəsində həbs cəzası çəkir. Mükafat onun övladlarına verilib.