BAKI, 4 oktyabr — Sputnik. Oktyabrın 4-də bir çox dünya şöhrətli aktyorlar, alimlər, idmançılar, yazıçılar və siyasətçilər dünyaya gəlib. Bu gün həmçinin tarixə düşən hadisələr də baş verib.
Oktyabrın 4-də kimlər anadan olub?
Könül Nağıyeva (1982) - azərbaycanlı aktrisa və rejissordur. O, "Qanun naminə", "Gerçək olamaz" və s. filmlərdə rol alıb.
Rixard Zorge (1895-1944) - İkinci Dünya Müharibəsi illərində sovet qeyri-qanuni kəşfiyyatçı, Yaponiyada sovet kəşfiyyatının rezidentidir (1933-1941). O, Sovet İttifaqı Qəhrəmanıdır. Rixard Zorge Bakıda anadan olub və XX əsrin görkəmli kəşfiyyatçılarından biri hesab olunur.
Rixard Zorge
© Sputnik / Виталий Аньков
Syuzan Sarandon (1946) - amerikalı kino aktrisadır. O, "Oskar" və BAFTA mükafatlarının qalibidir.
Armand Assante (1949) - ABŞ aktyorudur. O, "Fletbuşlu lordlar", "Evlilikdən necə sağ çıxmaq olar", "Napoleon və Jozefina" və s. filmlərdə rol alıb.
Lev Şrayber (1967) - amerikalı aktyor, rejissor, ssenarist və prodüserdir. O, "Toni" mükafatının laureatı, altı dəfə "Qızıl Qlobus" nominasiyasınin qalibidir. Aktyor "Dəli məhəbbət", "Keyt və Leo", "Omen" və s. filmlərlə məhşurlaşıb.
Dakota Conson (1989) - ABŞ kino aktrisasıdır. O, "Bozun əlli çaları", "Bir az evli" və s. filmlərdə rol alıb.
Dakota Conson
© AP Photo / Invision/Jordan Strauss
4 oktyabr tarixində dünyada baş verən tarixi hadisələr
1675-ci ildə holland fiziki Xristian Hüygens cib saatını patentləşdirib.
1911-ci ildə London metro stansiyalarından birində ilk eskalator işə salınıb.
1921-ci ildə SSRİ Dövlət Bankı yaradılıb.
1932-ci ildən Ümumdünya Heyvanların Müdafiəsi Günü qeyd olunur. Bu əlamətdar gün 1931-ci ildə Florensiyada (İtaliya) ekoloqların beynəlxalq konqresində heyvanların müdafiəsi üçün təqvimə daxil edilib.
2020-ci ildə ikinci Qarabağ müharibəsi zamanı Azərbaycan ordusu Cəbrayıl şəhərini və Cəbrayıl rayonunun bir neçə kəndini işğaldan azad edib. Həmin gün Ermənistan silahlı qüvvələri Gəncə şəhərini raket atəşinə tutub. Nəticədə 1 nəfər həlak olub, 32 nəfər yaralanıb.