BAKI, 4 oktyabr — Sputnik. Bu gün dünya bazarlarında neft qiymətləri cüzi ucuzlaşıb. Çünki investorlar neft axınını pozan daha geniş Yaxın Şərq münaqişəsi perspektivini qiymətləndiriblər. Lakin bu həftə neft qiymətlərində kəskin artım baş verib.
"Brent" markalı neft 8 sent ucuzlaşaraq 77,54 dollar, ABŞ-nin Qərbi Texas nefti 6 sent ucuzlaşaraq 73,65 dollar olub. Hər iki markalı neft həftəlik təxminən 8% bahalaşıb.
"Azeri Light" markalı Azərbaycan nefti 3,15 dollar, yaxud 4,10% artaraq 80,04 dollar təşkil edib.
Yaxın Şərqdə potensial tədarükün kəsilməsi ilə bağlı artan narahatlıqlar fonunda bu həftə neft bahalaşıb.
"Yaxın Şərqdə gərginlik artdıqca tədarük riskləri yenidən diqqət mərkəzindədir, lakin biz təsirin məhdud olacağını gözləyirik", analitiklər bildiriblər. Analitiklərin fikrincə, region dünya neft tədarükünün üçdə birindən çoxunu təşkil edir.
"The Wall Street Journal"ın Səudiyyə Ərəbistanının energetika naziri Əbdüləziz bin Salman Əl-Səudun OPEC+ üzvlərini alyansın razılaşmalarına əməl edilmədiyi təqdirdə neftin qiymətinin 50 dollar/barelə enə biləcəyi ilə bağlı xəbərdar etdiyi barədə iddiaları tamamilə əsassızdır. Bu barədə OPEC məlumat yayıb.
OPEC həmçinin vurğulayıb ki, keçən həftə Amerika nəşrinin yazdığı heç bir videokonfrans və ya OPEC plusun çağırışı olmayıb.
"Anonim mənbələrlə əlaqəli şübhəli iddialar heç bir etibarlılığa malik deyil və tamamilə uydurmadır" - bəyanatda vurğulanıb.
Xatırladaq ki, Azərbaycanın builki dövlət büdcəsində bir barel neftin orta qiyməti 75 dollardan hesablanıb. "Azeri Light" neftinin ən aşağı qiyməti 2020-ci il aprelin 21-də (15,81 dollar), maksimal qiyməti isə 2008-ci ilin iyulunda (149,66 dollar) qeydə alınıb.