Tarixdə bu gün: 1 oktyabr – FOTO

BAKI, 1 oktyabr — Sputnik. Oktyabrın 1-də bir çox dünya şöhrətli aktyorlar, alimlər, idmançılar, yazıçılar və siyasətçilər dünyaya gəlib. Bu gün həmçinin tarixə düşən hadisələr də baş verib.

Lev Nikolayeviç Qumilyov (1912-1992, Sankt-Peterburq) - tarixçi, alim və etnoqraf. Əslən tatar olan şairə Anna Axmatova və şair Nikolay Qumilyovun ailəsində doğulub. Onun tarixini araşdırdığı xalqlar və tayfalar arasında Orta və Mərkəzi Asiyadakı köçərilər, Tibet və Pamir xalqları, qədim ruslar, türklər və s. vardı. "Xəzərin kəşfi", "Xəyali Krallığın Axtarışı", "Qədim Rusiya və Böyük Çöl", "Xəzər ətrafında minillik" və s. kitabların müəllifidir. Onun "Qədim türklər" kitabı Azərbaycan dilinə tərcümə edilib.

Oleq Yefremov (1927-2000) - Sovet və Rusiya teatr və kino aktyoru, teatr rejissoru, SSRİ xalq artistidir. Aktyor "Plüşşixada üç qovaq", "Parla, parla, mənim ulduzum", "Aybolit-66" və s. filmlərdə rol alıb.

Nina Usatova (1951) - Sovet və Rusiya teatr və kino aktrisası, RF xalq artistidir. O, "On iki stul", "Fomenko hara yoxa çıxıb?", "Şahid", "Müsəlman" və s. filmlərdə bir çox obrazları canlandırıb.

Bri Larson (1989) - ABŞ aktrisası, müğənni və kinorejissordur. O, "Oskar", BAFTA, "Qızıl Qlobus" və "Emmi" mükafatlarının qalibidir.

Niletto (1991) - rusiyalı müğənni və rəqqasdır. Onun əsl adı Danil Pritkovdur. O, TNT kanalındakı "Mahnılar" layihəsinin (mövsüm 1, 2), həmçinin "Birinci Kanal"da "Rusiya nindzası" layihəsinin iştirakçısıdır.

1847-ci ildə elektrotexnika, elektronika, enerji avadanlıqları, nəqliyyat, tibbi avadanlıq və işıqlandırma texnikası sahəsində fəaliyyət göstərən alman şirkəti "Siemens AG" təsis edilib.

1990-cı ildən Beynəlxalq Ahıllar Günü qeyd olunur.

1975-ci ildən UNESCO-nun Beynəlxalq Musiqi Şurasının (BMM) təşəbbüsü ilə Beynəlxalq Musiqi Günü qeyd edilir.

1977-ci ildən Ümumdünya Vegetarianlıq Günü qeyd olunur. Bayram Şimali Amerika Vegetarian Cəmiyyəti tərəfindən təsis edilib.