Aİİ ölkələrinin ümumi birja bazarının 2030-cu ilə qədər formalaşdırılması planlaşdırılır

BAKI, 30 sentyabr — Sputnik. Avrasiya İqtisadi İttifaqı (Aİİ) ölkələrinin ümumi birja bazarının 2030-cu ilə qədər formalaşdırılması planlaşdırılır.

Bunu Avrasiya İqtisadi Komissiyasının (AİK) Rəqabət və antiinhisar tənzimlənməsi üzrə şurasının üzvü Maksim Yermoloviç deyib.

"Ümumi birja bazarı konsepsiyası layihəsinə sabah Avrasiya Hökumətlərarası Şurasının iclasında baxılacaq. Ümid edirik ki, dövlət başçıları tərəfindən bu konsepsiya təsdiqlənəcək. Bu, kifayət qədər qısa müddət ərzində ümumi birja bazarının formalaşmasının dörd mərhələsini nəzərdə tutur. Ümidvarıq ki, 2030-cu ilə qədər ümumi birja bazarı artıq fəaliyyətə başlayacaq", Yermoloviç bildirib.

Onun sözlərinə görə, bu müddət ərzində birja proqramları haqqında saziş hazırlanacaq və imzalanacaq.

"Konsepsiyanın ardınca təfərrüatlı tədbirlərin müəyyən ediləcəyi proqramın hazırlanması nəzərdə tutulur. Proqram layihəsi artıq mövcuddur və bu proqramın yalnız icrası, yəni proqramın praktikada tətbiqi qalacaq", AİK naziri izah edib.

Yermoloviç həmçinin əlavə edib ki, birjalar komissiyanın qərarlarını gözləmirlər, əksinə artıq konkret sazişlərlə dəstəklənən "qarşılıqlı fəaliyyətin ekoloji mühitini" yaratmaq üçün fəal işləyirlər - Sankt-Peterburq İqtisadi Forumunda beştərəfli saziş imzalanıb.

"Yəni birjalar özləri təşkil olunurlar, yalnız fiskal orqanlar üçün deyil, həm də standartlaşdırılmış malların satıldığı ümumi bazarların vəziyyətini izləmək məqsədi ilə ümumi bazar üçün çox vacib olan qiymət indikatorlarını formalaşdırmaq üçün qarşılıqlı fəaliyyətə başlayırlar", Yermoloviç söyləyib.

Onun sözlərinə görə, bu, həm də komissiya üçün çox vacibdir, çünki bu, genişləndirilə bilən qarşılıqlı fəaliyyət sxemidir.

"Gələcəkdə biz artıq ümumi birja məkanının formalaşdırılması üçün birjalar arasında əldə olunan razılaşmalara arxalanacağıq. Buna görə də proses komissiyada ümumi birja bazarının fəaliyyətinin standart qaydalarının işlənib hazırlanması səviyyəsində olduğu kimi, həm də praktikada bu bazarın yaradılması məqsədi ilə birjaların özlərinin və onların təşkilatlarının qarşılıqlı fəaliyyətində gedir", nazir fikrini yekunlaşdırıb.