BAKI, 27 sentyabr — Sputnik. Türkiyə iş adamlarının Rusiya ilə əməkdaşlığa görə təhdid, təzyiq və açıq şantaj üsulu Qərbin arsenalına daxil olub.
Bunu Rusiyanın Ankaradakı səfiri Aleksey Yerxov "RİA Novosti"yə deyib.
Bu gün agentliyə ölkənin dövlət banklarından birindəki mənbə bildirib ki, sentyabrın ortalarından etibarən Türkiyənin Rusiya ilə bank əməliyyatları ABŞ tərəfindən ciddi şəkildə idarə olunur, banklara göndərilən məktublar təhdid xarakteri daşıyır.
"Əslində burada təəccüblənəcək heç nə yoxdur. Təhdid, təzyiq və açıq-aşkar şantaj üsulu bizim qərbli həmkarlarımızın arsenalında çoxdan möhkəm oturub. Türkiyəli iş adamlarının sözlərinə görə, iş o yerə çatıb ki, artıq onların ofislərinə telefon zəngləri belə gəlir: "Salam, bu filankəsdir, səfirliyin ikinci katibidir (bundan sonra bir böyük dövlətin adı hallanır). Biz burada sizin şirkətinizin Rusiya ilə əməkdaşlığı inkişaf etdirdiyini öyrəndik. Deməli, düşünün ki, bizim banklarda sizin hesablarınız var, həm də bizim şirkətlərlə biznesiniz mövcuddur. Ehtiyyatlı olun nəsə bir hal baş verməsin", diplomat bildirib.
Onun sözlərinə görə, Türkiyə biznesi assosiasiyaları üçün bir növ "təlimlər" təşkil edən eyni ölkənin milli xəzinədarlığından olan nümayəndə heyətləri bu müddət ərzində konkret nümunələrlə Rusiya ilə əlaqələrə görə sanksiya siyahısına düşən şirkətlərlə nəyin və necə baş verə biləcəyini izah edir və göstərir.
"Bank sahəsində də eyni növ təzyiq nümunələri var. Aydındır ki, hər kəsi qorxuda bilməzsən, xüsusən də cəsarətli və qürurlu olan türk xalqını", Yerxov vurğulayıb.
Rusiya Federasiyası dəfələrlə bəyan edib ki, ölkə Qərbin bir neçə il əvvəl Rusiyaya qarşı tətbiq etməyə başladığı və artmaqda davam edən sanksiya təzyiqinin öhdəsindən gələcək. Moskva qeyd edib ki, Qərbin Rusiya Federasiyasına qarşı sanksiyaların uğursuzluğunu etiraf etməyə cəsarəti yoxdur. Qərb ölkələrinin özündə də anti-Rusiya sanksiyalarının səmərəsiz olması ilə bağlı fikirlər dəfələrlə səsləndirilib. Rusiya prezidenti Vladimir Putin bundan əvvəl bəyan etdib ki, Rusiyanı cilovlamaq və zəiflətmək siyasəti Qərbin uzunmüddətli strategiyasıdır və sanksiyalar bütün qlobal iqtisadiyyata ciddi zərbə vurub. Onun sözlərinə görə, Qərbin əsas məqsədi milyonlarla insanın həyatını pisləşdirməkdir.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.