BAKI, 26 sentyabr - Sputnik. Ermənistan özünü sülh gündəmini təbliğ edən ölkə kimi təqdim edir, amma reallıqda aktiv şəkildə silahlanır. Bunu "Sputnik Azərbaycan"a açıqlamasında politoloq İlyas Hüseynov deyib.
"Bu, təşviş doğurur və onu deməyə əsas verir ki, erməni tərəfinin mehriban qonşuluq münasibətləri qurmaq və regionda təhlükəsizliyi gücləndirmək niyyəti və ya istəyi yoxdur", - politoloq bildirib.
Ekspert vurğulayıb ki, Ermənistan Konstitusiyasında Azərbaycan və Türkiyəyə qarşı ərazi iddiaları var.
Onun sözlərinə görə, əsas qanuna dəyişikliklər edilməyincə, sülh müqaviləsinin imzalanmasından danışmağın mənası yoxdur.
"Ermənistanın sülh müqaviləsinin yalnız giriş hissəsini və razılaşdırılmış bəndləri nəzərə alaraq, rəsmi İrəvanın "yarımçıq sülh müqaviləsi" imzalamaq istədiyini deməyə əsas verir", - Hüseynov sözünü yekunlaşdırıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.