BAKI, 5 sentyabr — Sputnik. Rusiya Xarici İşlər Nazirliyi cavab tədbirləri hazırlamaq üçün "Rossiya Seqodnya" media qrupuna qarşı sanksiyaları öyrənir. Bunu Rusiya Xarici İşlər Nazirliyinin rəsmi nümayəndəsi Mariya Zaxarova Şərq iqtisadi Forumu (ŞİF) çərçivəsində RİA Novosti-yə bildirib.
"İndi biz bu məsələni öyrənməyə çalışacağıq, sonra reaksiya verəcəyik", - Zaxarova agentliyə müsahibəsində Vaşinqtonun "Rossiya Seqodnya" media qrupuna qarşı sanksiyalarına cavab olaraq Rusiyada amerikalı jurnalistlərə məhdudiyyətlərin tətbiqi ehtimalını şərh edərkən deyib.
Rusiya Xarici İşlər Nazirliyinin rəsmi nümayəndəsi qeyd edib ki, Moskva Qərbin sanksiyaları ilə bağlı situasiyada simmetrik davranmağa çalışır.
"Biz hələ ki, Rusiya mediası və jurnalistləri üçün tətbiq edilən müvafiq məhdudiyyətlərin tam həcmini tam başa düşmürük", - diplomat vurğulayıb.
Birləşmiş Ştatlar "Rossiya Seqodnya" media qrupu, RİA Novosti, RT, Sputnik, Ruptly-yə qarşı sanksiyalar tətbiq edib. Yeni sanksiyalar "Rossiya Seqodnya" media qrupunun və RT-nin baş redaktoru Marqarita Simonyan və bu telekanalın bir sıra top-menecerlərinə şamil edilib.
Şərq İqtisadi Forumu 3-6 sentyabr tarixlərində Vladivostokda Uzaq Şərq Federal Universitetinin kampusunda keçirilir. Sputnik BİA ŞİF-2024-ün baş informasiya tərəfdaşıdır.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.