BAKI, 5 sentyabr — Sputnik. Sentyabrın 14-də Almaniyanın Bonn şəhərində Almaniyadakı azərbaycanlı həkimlərin III Forumu keçiriləcək.
Diasporla İş üzrə Dövlət Komitəsindən bildiriblər ki, Almaniyadakı azərbaycanlı həkimlərin və tibb tələbələrinin iştirakı ilə keçiriləcək tədbirin məqsədi peşəkar biliyin və təcrübənin mübadiləsi, iki ölkənin tibb sahəsində əməkdaşlığının inkişafı, məsləkdaş həmvətənlərin şəbəkələşməsi və ümumilikdə Azərbaycan ilə Almaniya arasında əlaqələrin möhkəmləndirilməsidir.
Forumda öz sahələri üzrə aktual mövzuları müzakirə etmək məqsədilə Almaniyanın 79 müxtəlif şəhərindən həkimlər, tibbin müxtəlif sahələrində fəaliyyət göstərən ekspertlər bir araya gələcək. Tədbir, həmçinin azərbaycanlı həkimlərin Almaniya səhiyyəsinə verdiyi töhfəni tanıtmaq üçün hərtərəfli imkan yaradacaq.
Xatırladaq ki, Diasporla İş üzrə Dövlət Komitəsinin dəstəyi ilə həyata keçirilən Almaniyadakı azərbaycanlı həkimlərin I Forumu 2022-ci il mayın 5-də Kölndə, II Forumu isə 2023-cü il noyabrın 18-də Berlində təşkil edilib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.